WATUMISHI WA UMMA TUMIENI JITIHADA BINAFSI KUTOA HUDUMA BORA KWA WANANCHI

Na. Veronica Mwafisi-Dodoma

Tarehe 16 Aprili, 2021 

Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deogratius Ndejembi amewataka Watumishi wa Umma nchini kutumia jitihada binafsi katika kutekeleza majukumu yao ili kuboresha utoaji wa huduma kwa wananchi. 

Akiwa kwenye ziara ya kikazi katika Halmashauri ya Wilaya ya Chamwino, Mhe. Ndejembi amesema ni vema Watumishi wa Umma wakatathmini mchango wao binafsi katika Utumishi wa Umma ili waweze kuwa na tija katika utoaji wa huduma kwa umma. 

“Ukiwa Mtumishi wa Umma uliyejitoa kuwahudumia Watanzania unapaswa kujiuliza unataka kufanya nini ili kutimiza malengo yako na ya Taasisi kwa ujumla,” Mhe. Ndejembi amesisitiza. 

Kuhusiana na madai mbalimbali ya kiutumishi, Mhe. Ndejembi amewaambia watumishi hao kuwa, wakati Serikali inayafanyia kazi madai yao ni vema wakatekeleza wajibu wao kikamilifu ili madai yao yawe na thamani inayolingana na huduma wanayoitoa. 

Aidha, amewasisitiza Wakuu wa Idara na Vitengo katika Taasisi za Umma kuwasilisha mpango kazi kwa Watendaji Wakuu wa Taasisi zao utakaoziwezesha Idara na Vitengo pamoja na Taasisi kutekeleza majukumu kikamilifu. 

Katika kuhimiza uwajibikaji unaozingatia maadili ya kiutumishi, Mhe. Ndejembi amemuelekeza Mkurugenzi Mtendaji wa Halmashauri Wilaya ya Chamwino Bw. Athman Masasi, kumpa barua ya onyo Mpima Ardhi wa Halmashauri hiyo, Bw. Charles Laseko kwa kosa la kushinikizwa na Afisa Usalama kuweka alama ya mpaka kwenye Kiwanja ambacho kimeuzwa na Jiji kwa mtu mwingine. 

Ziara hiyo ilikuwa na lengo la kuhimiza uwajibikaji kwa Watumishi wa Umma.

Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deogratius Ndejembi (katikati) akisisitiza jambo kwa Watumishi wa Halmashauri ya Wilaya ya Chamwino (hawapo pichani) wakati wa kikao kazi chake na watumishi hao chenye lengo la kuhimiza uwajibikaji. 

Baadhi ya Watumishi wa Halmashauri ya Wilaya ya Chamwino, wakimsikiliza Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deogratius Ndejembi, wakati wa kikao kazi cha Naibu Waziri huyo na Watumishi hao chenye lengo la kuhimiza uwajibikaji.

Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deogratius Ndejembi (katikati) akisikiliza hoja za Watumishi wa Halmashauri ya Wilaya ya Chamwino wakati wa kikao kazi chake na watumishi hao chenye lengo la kuhimiza uwajibikaji.  

Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deogratius Ndejembi akihoji utendaji kazi wa Mpima Ardhi wa Halmashauri ya Wilaya ya Chamwino, Bw. Charles Laseko (aliyesimama) anayetuhumiwa kumuwekea Afisa Usalama alama ya mpaka kwenye Kiwanja ambacho kimeuzwa na Jiji kwa mwananchi mwingine.

 

 

 

SERIKALI YAWATAKA WATANZANIA KUMPUUZA PROF. ASSAD KWA HOJA ZAKE DHAIFU DHIDI YA SEKTA YA UMMA

 Na. James K. Mwanamyoto

Tarehe 15 Aprili, 2021

Katibu Mkuu, Ofisi ya Rais, Menejimenti ya Utumishi wa Umma, Dkt. Laurean Ndumbaro amewataka Watanzania kumpuuza Mkaguzi na Mdhibiti wa Hesabu za Serikali Mstaafu, Prof. Mussa Assad kwa kutoa tuhuma kuwa, Maafisa na Viongozi katika Taasisi za Umma wana uwezo mdogo kiutendaji.

Dkt. Ndumbaro ametoa wito huo kwa Watanzania kupitia vyombo vya habari, baada ya Prof. Assad hivi karibuni kuzungumza kwenye mdahalo uliofanyika Chuo Kikuu cha Kiislam mkoani Morogogoro, kuwa asilimia 60 ya Watumishi na Viongozi wa Umma nchini hawana uwezo wa kutekeleza majukumu yao wakati asilimia 40 wana uwezo kidogo.

Akifafanua kuhusu uwezo wa kiutendaji walionao Watumishi na Viongozi wa umma, Dkt. Ndumbaro amesema tuhuma alizozitoa Prof. Assad zilijikita katika hisia na maoni yake binafsi kuliko uwezo wa kiakili na kitaaluma alionao na wala hakufanya tafiti, kwani watumishi na viongozi wanatekeleza majukumu yao vizuri na ndio maana nchi imepata maendeleo makubwa katika sekta za elimu, miundombinu pamoja na afya na hatimaye taifa limeingia katika uchumi wa kati.

Dkt. Ndumbaro amefafanua kuwa, Watumishi Watendaji na Viongozi wa Umma hupanda au kuteuliwa kuwa Viongozi katika Utumishi wa Umma kwa mujibu wa Miongozo ya Utumishi wa Umma ambayo pamoja na mambo mengine huzingatia sifa mbalimbali za weledi na vigezo vya majukumu wanayopaswa kuyatekeleza.

Ametoa mfano wa namna Serikali inavyohakikisha inakuwa na rasilimaliwatu yenye sifa stahiki kwa kuzingatia ipasavyo Sera ya Menejimenti na Ajira katika Utumishi wa Umma Kifungu Na. 4.3 (ii) ambayo imebainisha kuwa, Vigezo vya Uteuzi katika Utumishi wa Umma vizingatie Uwiano kati ya Taaluma na Ujuzi wa kazi pamoja na sifa nyingine kama Uzoefu Kazini, rekodi kazini na uwezo wa kujifunza.

Dkt. Ndumbaro ameuthibitishia umma kuwa, Watumishi wana uwezo kiutendaji kwani pindi Watumishi wa Umma wanapoteuliwa kwa mara ya kwanza kushika nafasi za uongozi katika taasisi za Serikali, hupatiwa mafunzo elekezi ya utawala na uongozi ndani ya kipindi cha miezi mitatu hivyo kuondoa uwezekano wa kuwa na viongozi wasiokuwa na uwezo wa kutekeleza majukumu yao ipasavyo.

Ameongoza kuwa, viongozi wengine wa Umma, hupewa mafunzo ya stadi na weledi (profiency and meritocracy) ambayo yamewawezesha kuboresha utendaji kazi wao ndani ya Utumishi wa Umma, pia mafunzo katika ngazi mbalimbali za elimu yaani Stashahada, Shahada, Shahada ya Uzamili na uzamivu hutolewa ndani na nje ya nchi ili kuwajengea uwezo wa kiutendaji.

Dkt. Ndumbaro amesisitiza kuwa, kutokana na mafunzo hayo waliyopatiwa na wanayoendelea kupatiwa Watumishi na Viongozi wa Umma, yamewawezesha kuimarika katika kutekeleza majukumu yao na baadhi yao wameaminiwa na kuteuliwa kutekeleza majukumu mbalimbali katika Taasisi za Kikanda na Kimataifa, hivyo wamedhihirisha kwa vitendo kuwa hoja ya Prof. Assad ya kuwatuhumu kutokuwa na uwezo kiutendaji ni ya kizushi na haina mantiki wala mashiko yoyote. 

Aidha, Dkt. Ndumbaro amemkumbusha Prof. Assad kuendelea kuheshimu Katiba, Sheria, Maadili ya Uongozi na kiapo cha kazi aliyowahi kuifanya licha ya kuwa ni kiongozi mstaafu, kwani kinyume chake atakuwa ameipuuza katiba kwa kuvunja sheria.

Ofisi ya Rais, Menejimenti ya Utumishi wa Umma na Utawala Bora kama msimamizi wa masuala ya Kiutumishi na Utawala Bora nchini imelazimika kutolea ufafanuzi tuhuma za Prof. Assad kwani hazina ukweli wowote hivyo wananchi waendelee kuwa na imani na Utumishi wa Umma uliopo.

Katibu Mkuu, Ofisi ya Rais, Menejimenti ya Utumishi wa Umma, Dkt. Laurean Ndumbaro (kushoto) akitoa ufafanuzi kwa Waandishi wa Habari jijini Dodoma kuhusu tuhuma za Prof. Mussa Assad dhidi ya Sekta ya Umma. Kulia ni Mkurugenzi Idara ya uendelezaji Sera Ofisi ya Rais - UTUMISHI, Bi. Agnes Meena.

Baadhi ya Waandishi wa Habari wakimsikiliza Katibu Mkuu, Ofisi ya Rais, Menejimenti ya Utumishi wa Umma, Dkt. Laurean Ndumbaro (hayupo pichani) wakati akitoa ufafanuzi jijini Dodoma kuhusu tuhuma alizozitoa Prof. Mussa Assad dhidi ya Sekta ya Umma nchini.

WAAJIRI SERIKALINI WATAKIWA KUWA NA MABARAZA YA WAFANYAKAZI YANAYOFANYA KAZI KIKAMILIFU

 Na. Veronica Mwafisi-Dodoma

Tarehe 15 Aprili, 2021

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Mohamed Mchengerwa amewataka Waajiri katika Taasisi za Umma kuhahakisha wanakuwa na mabaraza hai ya wafanyakazi, yanayotekeleza wajibu wake kikamilifu ili kutoa haki ya ushirikishwaji kwa watumishi katika masuala muhimu yanayohusu ustawi wao. 

Mhe. Mchengerwa ametoa wito huo wakati akifungua Mkutano wa Baraza Kuu la Nne la Wafanyakazi katika Utumishi wa umma jijini Dodoma.

Mhe. Mchengerwa amesema, amelazimika kuwaelekeza waajiri kuwa na mabaraza hai ya wafanyakazi kwasababu amekuwa akipokea taarifa nyingi katika kipindi hiki kuwa yapo mabaraza yasiyofanya kazi wakati mabaraza yapo kwa mujibu wa sheria.

Ili kuhakikisha waajiri wanakuwa na mabaraza hai ya wafanyakazi, Mhe. Mchengerwa amemtaka Mwenyekiti wa Baraza Kuu la Nne la Wafanyakazi katika Utumishi wa Umma, Dkt. Laurean Ndumbaro kuhakikisha katika mkutano wa baraza lijalo anampatia taarifa ya taasisi zote ambazo hazina mabaraza ya wafanyakazi kwani kutokuwa na mabaraza ni kuwanyima watumishi haki ya msingi ya kushirikishwa katika mambo muhimu yanayohusu mustakabali wa maendeleo yao ya kiutumishi. 

Sanjali na hilo, amemtaka Mwenyekiti wa Baraza kumpatia taarifa ya Mabaraza ya Wafanyakazi ambayo hayafanyi kazi na vikao kwa mujibu wa sheria kwani kuwa na mabaraza ni jambo moja na kufanya vikao ni jambo jingine, hivyo mabaraza lazima yafanyike ili kutekeleza wajibu wake.

Mhe. Mchengerwa amesititiza kuwa, ofisi yake itafuatilia kwa karibu na itachukua hatua stahiki iwapo itabaini kuna uzembe umefanywa na waajiri ili kukwamisha uwepo wa Mabaraza ya Wafanyakazi au utekelezaji wa majukumu ya Mabaraza hayo.

Baraza Kuu la Wafanyakazi katika Utumishi wa Umma limeundwa kwa mujibu wa Kifungu cha 30 (1) (2) cha Sheria ya Majadiliano ya Pamoja katika Utumishi wa Umma SURA 105.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Mohamed Mchengerwa (katikati) akifungua Mkutano wa Baraza Kuu la Nne la Wafanyakazi katika Utumishi wa Umma jijini Dodoma. Kulia kwake ni Mwenyekiti wa Baraza hilo, Dkt. Laurean Ndumbaro na kushoto kwake ni Makamu Mwenyekiti wa Baraza, Bi. Leah Ulaya.

Wajumbe wa Mkutano wa Baraza Kuu la Nne la Wafanyakazi katika Utumishi wa Umma wakimsikiliza Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Mohamed Mchengerwa wakati akifungua Mkutano wa Baraza hilo jijini Dodoma.

Baadhi ya Wakurugenzi na Watumishi wa Ofisi ya Rais, Menejimenti ya Utumishi wa Umma na Utawala Bora wakimsikiliza Mhe. Mchengerwa wakati akifungua Mkutano wa Baraza Kuu la Nne la Wafanyakazi katika Utumishi wa Umma jijini Dodoma.

Makamu Mwenyekiti wa Baraza Kuu la Nne la Wafanyakazi katika Utumishi wa Umma, Bi. Leah Ulaya akitoa neno la shukrani kwa Mhe. Mchengerwa kwa niaba ya Wajumbe wa Baraza hilo mara baada ya Waziri huyo kufungua Mkutano wa Baraza Kuu la Nne la Wafanyakazi katika Utumishi wa Umma jijini Dodoma.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Mohamed Mchengerwa akiwa katika picha ya pamoja na Wajumbe wa Mkutano wa Baraza Kuu la Nne la Wafanyakazi katika Utumishi wa Umma jijini Dodoma. 

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Mohamed Mchengerwa akizungumza jambo na Katibu Mkuu wa Ofisi yake, Dkt. Laurean Ndumbaro mara baada ya Waziri huyo kufungua Mkutano wa Baraza Kuu la Nne la Wafanyakazi katika Utumishi wa Umma jijini Dodoma.