UTUMISHI SC YAICHAKAZA IKULU 28–27 NA KUTWAA UBINGWA WA MPIRA WA NETIBOLI SHIMIWI 2026

 Na Eric Amani, Moshi

Timu ya mpira wa pete ya Utumishi Sports Club imetwaa ubingwa wa mpira wa netiboli katika Mashindano ya 40 ya Shirikisho la Michezo ya Wizara, Idara, Wakala za Serikali na Ofisi za Wakuu wa Mikoa (SHIMIWI) 2026, baada ya kuichakaza timu ya Ikulu kwa magoli 28–27 katika mchezo wa fainali.

Fainali hiyo iliyochezwa Leo Oktoba 06, 2026 katika Uwanja wa Ushirika mkoani Kilimanjaro, imekuwa kilele cha safari ya Utumishi SC katika mashindano hayo, huku timu hiyo ikionesha kiwango bora, mshikamano na nidhamu ya hali ya juu tangu hatua za awali za michuano.

Utumishi SC iliingia uwanjani ikiwa na dhamira ya kutwaa ubingwa na kuendeleza rekodi yake nzuri katika mashindano hayo. Tangu mwanzo wa mchezo, wachezaji wake walionesha umakini na kasi katika kujenga mashambulizi, huku wakitumia kwa ufanisi nafasi walizopata mbele ya lango la Ikulu.

Ikulu, kwa upande wake, haikuwa tayari kusalimu amri mapema, ikiendelea kutoa upinzani na kutumia nafasi ilizopata kupunguza tofauti ya magoli. Hata hivyo, Utumishi SC iliendelea kuwa imara katika safu zake na kudhibiti mwenendo wa mchezo.

Kadiri mchezo ulivyoendelea, Utumishi SC iliongeza kasi na ufanisi katika ufungaji, huku safu ya ulinzi ikifanya kazi kubwa kuzuia mashambulizi ya Ikulu. Ushirikiano mzuri baina ya wachezaji uliiwezesha timu hiyo kuendelea kuongoza hadi kufikia ushindi wa magoli 28–27.

Ushindi huo umehitimisha kampeni nzuri ya Utumishi SC katika SHIMIWI 2026, baada ya timu hiyo kuendelea kuonesha ubora katika michezo yake mbalimbali. Miongoni mwa ushindi uliovuta hisia katika hatua za awali ni ule wa 63–0 dhidi ya RAS Mara, pamoja na ushindi wa 90–8 dhidi ya Elimu katika robo fainali.

Aidha, kabla ya fainali, Utumishi SC iliendelea kuonesha ubora wake kwa kuichapa Ujenzi 89–10, matokeo yaliyoiweka timu hiyo katika nafasi nzuri kuelekea mchezo wa kuwania ubingwa dhidi ya Ikulu.

Kwa ushindi huo, Utumishi SC imefunga safari yake ya SHIMIWI 2026 kwa mafanikio makubwa, ikitwaa ubingwa wa mchezo wa netiboli baada ya kuonesha kiwango bora, umoja na kujituma katika kipindi chote cha mashindano.

Utumishi SC — Umoja Kazini, Ushindi Uwanjani!