KAPINGA: MAONI YA WATEJA NI MSINGI WA KUBORESSHA HUDUMA ZA UTUMISHI WA UMMA

Na. Antonia Mbwambo – Dodoma

Tarehe 9 Oktoba, 2026

Kaimu Katibu Mkuu, Ofisi ya Rais, Menejimenti ya Utumishi wa Umma na Utawala Bora, Bw. Cyrus Kapinga, amewahimiza wananchi na Watumishi wa Umma wanaopata huduma kwa njia ya mtandao na wale wanaotembelea Ofisi hiyo kuendelea kutoa maoni na mapendekezo yatakayochangia kuboresha huduma zinazotolewa.

Bw. Kapinga ametoa wito huo Oktoba 9, 2026, wakati akimwakilisha Katibu Mkuu-UTUMISHI, Bw. Juma Mkomi, katika hafla ya kilele cha Wiki ya Huduma kwa Mteja iliyofanyika katika eneo maalumu la Ofisi hiyo, Mtumba, jijini Dodoma.

Amesema maoni na mrejesho kutoka kwa wateja ni nyenzo muhimu katika kutathmini ubora wa huduma, kutambua changamoto na kubaini maeneo yanayohitaji maboresho ili kuongeza ufanisi na kukidhi mahitaji ya wananchi na Watumishi wa Umma.

“Tunawahimiza wananchi na Watumishi wa Umma kupitia mtandao na wale wanaotembelea Ofisi yetu kupata huduma mbalimbali kuendelea kutoa maoni na mapendekezo kwani mrejesho wao utatusaidia kutambua mapungufu na maeneo yanayohitaji maboresho ili kuimarisha utoaji wa huduma,” amesema Kapinga.

Aidha, Bw. Kapinga ameeleza kuwa Ofisi hiyo imeweka utaratibu wa kupokea maoni na mrejesho kutoka kwa wateja kupitia njia mbalimbali, zikiwemo sanduku la maoni, mitandao ya kijamii, simu ya huduma kwa wateja na mfumo wa e-Mrejesho. Amewahimiza wananchi na Watumishi wa Umma kutumia njia hizo kuwasilisha maoni, ushauri na mapendekezo yao kwa lengo la kuboresha huduma zinazotolewa.

Bw. Kapinga amewashukuru wananchi na Watumishi wa Umma wanaoendelea kutumia huduma za Ofisi hiyo, huku akiwakaribisha kuendelea kunufaika na huduma hizo kwa maslahi ya Taifa.