UTUMISHI YAIGALAGAZA UJENZI 89–10 MPIRA WA PETE

 Na Eric Amani, Moshi

 

Timu ya mpira wa pete ya Utumishi imeendeleza kiwango chake bora katika Mashindano ya SHIMIWI 2026 baada ya kuibuka na ushindi wa kishindo wa mabao 89–10 dhidi ya timu ya Ujenzi.

 

Oktoba 04, 2026 katika uwanja wa ushirika Utumishi ilianza mchezo huo kwa kasi na umakini, ikitawala maeneo mbalimbali ya uwanja na kutumia kwa ufanisi nafasi ilizopata katika eneo la ushambuliaji. Uwezo wa timu hiyo kujenga mashambulizi na kuyakamilisha kwa usahihi uliiwezesha kupata mabao mengi na kujenga tofauti kubwa dhidi ya Ujenzi.

 

Kadiri mchezo ulivyoendelea, Utumishi iliendelea kudhibiti mwelekeo wa mchezo, huku ikionyesha ushirikiano mzuri kati ya safu ya ulinzi na ushambuliaji. Ufanisi huo uliiwezesha timu hiyo kuongeza mabao na hatimaye kumaliza mchezo ikiwa mbele kwa mabao 89–10.

 

Ushindi huu unaendelea kuimarisha mwenendo wa Utumishi SC katika michuano hiyo, huku timu hiyo ikionyesha dhamira ya kufanya vizuri na kuendelea kupambana kuelekea mchezo wa fainali SHIMIWI 2026 dhidi ya Ikulu.

 

Mashindano hayo yanaendelea Moshi, mkoani Kilimanjaro, Umoja Kazini, Ushindi Uwanjani

UTUMISHI SC YAICHAPA ELIMU 90–8, YATINGA NUSU FAINALI SHIMIWI 2026

Na Eric Amani, Kilimanjaro

Timu ya Mpira wa Pete ya Utumishi SC imefuzu hatua ya nusu fainali ya Mashindano ya SHIMIWI 2026 baada ya kuichapa timu ya Elimu kwa mabao 90–8, katika mchezo wa robo fainali uliochezwa Oktoba 1, 2026, katika Uwanja wa Ushirika, Moshi, mkoani Kilimanjaro.

Utumishi SC ilianza mchezo huo kwa kasi na umakini, ikitumia vyema nafasi za kufunga ilizozipata huku ikionesha ushirikiano mzuri katika maeneo mbalimbali ya uwanja. Mchezo huo uliendelea kuwa wa ushindani kwa upande wa Utumishi SC, ambayo ilitumia uwezo wake wa kushambulia na kumalizia nafasi kuongeza idadi ya mabao.

Katika kipindi chote cha mchezo, Utumishi SC iliendelea kudhibiti mwenendo wa mchezo na kuweka presha katika lango la Elimu, huku safu yake ya ulinzi ikifanya kazi ya kuzuia mashambulizi ya wapinzani. Ufanisi huo uliifanya timu hiyo kuendelea kuongeza mabao hadi kufikisha 90 dhidi ya 8 ya Elimu.

Ushindi huo wa tofauti ya mabao 82 umeiwezesha Utumishi SC kutinga hatua ya nusu fainali, hatua ambayo sasa inaiweka timu hiyo katika nafasi ya kuendelea kuwania nafasi ya juu katika Mashindano ya SHIMIWI 2026.

Baada ya ushindi huo, Utumishi SC inaendelea na maandalizi kuelekea mchezo wa nusu fainali, huku ikilenga kuendeleza kiwango ilichokionesha katika hatua zilizopita za mashindano hayo.

Mashindano ya SHIMIWI 2026 yanaendelea Moshi, mkoani Kilimanjaro, yakishirikisha timu za taasisi mbalimbali za Serikali katika michezo tofauti.

Umoja Kazini Ushindi Uwanjani

 

NAIBU WAZIRI MHE. QWARAY ATOA MAELEKEZO SITA KWA WAAJIRI, WATUMISHI NA MAMLAKA ZA AJIRA NA NIDHAMU

Na Lusungu Helela, Simanjiro

Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Regina Qwaray ametoa maelekezo kwa Waajiri na Mamlaka za Ajira na Nidhamu, akitaka changamoto za kiutumishi kushughulikiwa kwa wakati na kuboresha utoaji wa huduma kwa wananchi kwa kuzingatia sheria, maadili, usawa na uwajibikaji.

Mhe. Qwaray ametoa maelekezo hayo leo, Jumanne Septemba 29, 2026  wakati wa kikao kazi cha kusikiliza changamoto zinazowakabili Watumishi wa Umma na kuzitafutia ufumbuzi katika Halmashauri ya Wilaya ya Simanjiro ambapo amesisitiza umuhimu wa kuboresha utendaji na kuhakikisha watumishi hao wanatekeleza majukumu yao kwa weledi na uadilifu.

Katika maelekezo yake, Mhe. Qwaray amewaagiza waajiri wote kuhakikisha changamoto na stahiki za watumishi, ikiwemo kupandishwa vyeo, uhamisho, malimbikizo ya mishahara na mafao, vinashughulikiwa kwa wakati na kuongeza kuwa madai ya watumishi yanapaswa kuhakikiwa ipasavyo na kuwasilishwa yakiwa na nyaraka zote muhimu ili kuwezesha malipo kufanyika kwa wakati.

Aidha, ameagiza Mamlaka za Ajira na Nidhamu kusimamia haki na wajibu wa watumishi kwa kuzingatia Sheria, Kanuni na Taratibu za Utumishi wa Umma, huku akitaka kuachwa kwa utendaji wa mazoea.

Mhe. Qwaray amesema mambo yaliyo ndani ya Waajiri na Mamlaka za Ajira na Nidhamu yanapaswa kushughulikiwa ipasavyo badala ya kuendelea kuwasilishwa Ofisi ya Rais, Menejimenti ya Utumishi wa Umma na Utawala Bora na kuwasisitiza kuzingatia mahitaji na tofauti za makundi mbalimbali ya jamii bila ubaguzi, hatua aliyoeleza kuwa ni muhimu katika kujenga Utumishi wa Umma jumuishi na wenye usawa.

Kuhusu maadili, Mhe. Qwaray amewataka watumishi wote kuyafahamu, kuyatekeleza na kuheshimu Kanuni za Maadili ya Utendaji katika Utumishi wa Umma.

Amesema watumishi wanaokiuka maadili au kutotekeleza majukumu yao ipasavyo wanapaswa kuchukuliwa hatua stahiki za kinidhamu kwa wakati.

Ameitaja misingi hiyo kuwa ni kutoa huduma bora, utii kwa Serikali, bidii ya kazi, kutoa huduma bila upendeleo, kufanya kazi kwa uadilifu, kuwajibika kwa umma, kuheshimu sheria na matumizi sahihi ya taarifa.

Katika eneo la mafunzo, Naibu Waziri amewataka waajiri kuhakikisha watumishi wapya wanapatiwa mafunzo ya awali ndani ya miezi mitatu tangu kuajiriwa huku akiwasisitiza kutenga bajeti kwa ajili ya mafunzo hayo na fedha za kujikimu na stahiki nyingine za watumishi.

Akizungumzia ukaguzi wa utekelezaji wa Sheria na Taratibu Kanuni za kiutumishi, Mhe. Qwaray amewataka waajiri na mamlaka zote za ajira na nidhamu kushirikiana kikamilifu na Tume ya Utumishi wa Umma katika zoezi hilo na kuwaagiza kurekebisha mapungufu yatakayobainika na kuhakikisha maelekezo ya Tume yanatekelezwa kwa wakati, akisema hatua hiyo inalenga kuimarisha uzingatiaji wa sheria na uwajibikaji katika Utumishi wa Umma.

Wakati huo huo, Mhe. Qwaray amesisitiza matumizi ya mifumo ya kidijitali katika utendaji wa Serikali huku akisema teknolojia ni muhimu katika kuongeza uwajibikaji, ufanisi na ubora wa huduma huku akiitaja mifumo hiyo kuwa ni e-Msawazo, e-Watumishi, Watumishi Portal, e-Utendaji (PEPMIS), e-Mrejesho, Sema na Waziri wa Utumishi pamoja na Dawati la Huduma kwa Mteja (UTUMISHI Call Centre).

Vile vile, amesisitiza matumizi ya Daftari la Huduma za Serikali (GSD), linalowezesha wananchi, wafanyabiashara na wageni kupata taarifa za huduma za Serikali, gharama, masharti na namna ya kuzipata bila ulazima wa kufika ofisini.

“Matumizi ya mifumo hiyo yanaweza kupunguza urasimu, kuongeza uwazi na ufanisi na kusogeza huduma za Serikali karibu zaidi na wananchi,” ameongeza.

Akizungumza kuhusu utekelezaji wa Dira ya Taifa ya Maendeleo 2050, amesema Watumishi wa Umma ni rasilimali muhimu katika kufanikisha malengo ya maendeleo ya nchi na kusisitiza watumishi kuongeza kasi ya utendaji, kutumia kikamilifu mifumo ya kidijitali kuhakikisha kila mwananchi anapata haki na huduma stahiki kwa wakati na bila usumbufu.

“Mabadiliko tunayoyataka yanadai weledi wa hali ya juu, ubunifu wa kitaaluma na uadilifu usio na mashaka kutoka kwa kila mmoja wenu, bila kujali kada au idara mliyopo,” alisema.

Naibu Waziri wa Ofisi ya Rais,Menejimenti ya Utumishi wa Umma na Utawala Bora, Mhe. Regina Qwaray akisaini kitabu mara baada ya kuwasili  katika Halmashauri ya Simanjiro iliyopo katika Mkoa wa Manyara  kwa lengo la kusikiliza changamoto zinazowakabili watumishi na kuzitafutia ufumbuzi

Naibu Waziri wa Ofisi ya Rais,Menejimenti ya Utumishi wa Umma na Utawala Bora, Mhe. Regina Qwaray akisalimiana na baadhi ya viongozi na  watumishi mara  baada ya kuwasili leo katika Ofisi ya Halmashauri ya wilaya ya Simanjiro  kwa lengo la kuzungumza na kusikiliza changamoto zinazowakabili

Mkuu wa Idara ya Maendeleo ya Jamii, Bi. Angela Kazimoto akizungumza mbele ya Naibu Waziri wa Ofisi ya Rais,Menejimenti ya Utumishi wa Umma na Utawala Bora, Mhe. Regina Qwaray mara baada ya kuwasili  katika Halmashauri ya Simanjiro iliyopo katika Mkoa wa Manyara  kwa lengo la kusikiliza changamoto zinazowakabili watumishi na kuzitafutia ufumbuzi

Baadhi ya watumishi wa  Halmashauri ya  wilaya ya Simanjiro iliyopo mkoani Manyara wakimsikiliza Naibu Waziri wa Ofisi ya Rais,Menejimenti ya Utumishi wa Umma na Utawala Bora, Mhe. Regina Qwaray mara  baada ya kuwasili kwa lengo la kusikiliza changamoto zinazowakabili watumishi na kuzitafutia ufumbuzi