AFISA UTUMISHI ATAKAYESHINDWA KUTATUA KERO ZA WATUMISHI NA WANANCHI KUONDOLEWA KWENYE UTUMISHI WA UMMA

Na. James K. Mwanamyoto-Dodoma

Tarehe 13 Aprili, 2021

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Mohamed O. Mchengerwa amesema, iwapo Katibu Mkuu wa Ofisi yake na Naibu Waziri wake au yeye mwenyewe ataitembelea taasisi yoyote ya umma na kubaini Afisa Utumishi kashindwa kutatua kero za watumishi wa umma na wananchi wanaofuata huduma, atalazimika kumuondoa ili kumpa nafasi mtumishi mwingine mwenye uwezo wa kutoa huduma bora.

Mhe. Mchengerwa amesema hayo wakati wa kikao kazi chake na watumishi wa ofisi yake kilichofanyika katika ofisi yake iliyopo Mtumba jijini Dodoma kwenye Mji wa Serikali kwa lengo la kujitambulisha na kuhimiza uwajibikaji kwa watumishi hao.

Mhe. Mchengerwa amesisitiza kuwa, ni dhamira ya Serikali kuwapa huduma stahiki watumishi wake pamoja na wananchi ambao ndio wameiamini na kuipa dhamana ya uongozi Serikali iliyopo madarakani ili ihakikishe wananchi wanapata huduma bora na kwa wakati.

 

Kutokana na imani hiyo ya wananchi kwa Serikali, Mhe. Mchengerwa ametoa wito kwa Maafisa Utumishi wote katika Taasisi za Umma kuhakikisha wanasikiliza kero za watumishi na wananchi katika maeneo yao ya kazi, na kuongeza kuwa iwapo itabainika kuna Afisa Utumishi yeyote kashindwa kutatua kero zilizopo ndani ya uwezo wake ataielekeza mamlaka husika kusitisha ajira ya afisa huyo.

“Sitoweza kuvumilia kamwe uzembe wa aina yoyote unaomnyima haki mtumishi wa umma au mwananchi anayefuata huduma katika taasisi yoyote ya umma”, Mhe. Mchengerwa alisisitiza. 

Akizungumzia maelekezo ya Mhe. Waziri kuhusu utatuzi wa kero za Watumishi wa Umma, Katibu Mkuu, Ofisi ya Rais, Menejimenti ya Utumishi wa Umma Dkt. Laurean Ndumbaro ameilekeza Idara ya Utawala wa Utumishi wa Umma na Idara ya Usimamizi wa Rasilimaliwatu Serikalini kuainisha taasisi na halmashauri zenye malalamiko mengi ya watumishi ili aanze kufanyia kazi taasisi hizo ikiwa ni sehemu ya utekelezaji wa maelekezo ya Waziri Mchengerwa.

Kwa upande wake, Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deogratius Ndejembi amemhakikishia Mhe. Mchengerwa kuwa, ofisi inaendelea na mchakato wa kuanzisha huduma ya CALL CENTRE itakayotoa fursa kwa watumishi na wananchi kupiga simu na kutuma ujumbe ili kutatuliwa kero na malalamiko yao ya kiutumishi.

Sanjali na hilo, Mhe. Ndejembi ameahidi kuwa, atashirikiana na Idara ya TEHAMA Serikalini kuandaa mfumo rafiki utakaowawezesha watumishi wa umma nchini kuwasilisha kero na malalamiko yao ili yafanyiwe kazi kwa wakati.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Mohamed O. Mchengerwa amefanya kikao kazi chake cha kwanza na watumishi wa ofisi yake kwa lengo la kujitambulisha, kuhimiza uwajibikaji na kutoa maelekezo ya kiutumishi ikiwa ni pamoja na kuanisha azma yake ya kujenga Utumishi wa Umma wenye tija kwa maendeleo ya Taifa.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Mohamed O. Mchengerwa (Mb) akizungumza na watumishi wa ofisi yake iliyopo Mtumba jijini Dodoma wakati wa kikao kazi chake na watumishi hao chenye lengo la kujitambulisha na kuhimiza uwajibikaji kwa watumishi hao.

Watumishi wa Ofisi ya Rais, Menejimenti ya Utumishi wa Umma na Utawala Bora wakimsikiliza Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Mohamed O. Mchengerwa (hayupo pichani) wakati wa kikao kazi cha Waziri huyo na watumishi hao chenye lengo la kujitambulisha na kuhimiza uwajibikaji kwa watumishi hao.

Katibu Mkuu, Ofisi ya Rais, Menejimenti ya Utumishi wa Umma, Dkt. Laurean Ndumbaro akitoa neno la utangulizi wakati wa kikao kazi cha Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Mohamed O. Mchengerwa (Mb) na watumishi wa ofisi yake chenye lengo la kuhimiza uwajibikaji kwa watumishi wa ofisi hiyo.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. Mohamed O. Mchengerwa (kushoto) akipokea Taarifa ya utekelezaji wa majukumu ya ofisi yake toka kwa Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deogratius Ndejembi, mara baada ya waziri huyo kuzungumza na watumishi wa ofisi yake wakati wa kikao kazi cha kuhimiza uwajibikaji.

SERIKALI KUOWANDOA KWENYE MPANGO WANUFAIKA WA TASAF WATAKAOSHINDWA KUTUMIA RUZUKU KUBORESHA MAISHA YAO

Na. Veronica Mwafisi-Momba

Tarehe 11 Aprili, 2021

Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deogratius Ndejembi amesema, Serikali haitosita kuwaondoa wanufaika wa Mpango wa Kunusuru Kaya Maskini nchini watakaoshindwa kutumia vema ruzuku wanayopewa na TASAF ili kuboresha maisha yao kama ambavyo Serikali imekusudia.

Mhe. Ndejembi amesema hayo akiwa kwenye ziara ya kikazi ya kukagua utekelezaji wa Mpango wa Kunusuru Kaya Maskini katika vijiji vya Msangano, Nkala na Chiwanda Wilayani Momba na kuongeza kuwa, baada ya mwaka mmoja atarejea kujiridhisha kama fedha za ruzuku zilizotolewa kwa kaya maskini zimetumika vizuri kuboresha maisha hivyo kaya zitakazobainika kutumia tofauti na malengo zitaondolewa kwenye mpango. 

Amesisitiza kuwa, ni wajibu wa kila mnufaika kutumia ruzuku anayoipata katika shughuli zitakazomuongezea kipato kama kilimo na ufugaji ili kuboresha maisha yake, na kuongeza kuwa Maafisa Ugani wana jukumu la kuhakikisha wanawasaidia wanufaika kufuga na kulima kisasa.

Amewaasa wanufaika juu ya ruzuku wanayoipata kuwa si kwa ajili ya anasa kwani Serikali inatoa kwa kaya maskini ili kuziwezesha kujikwamua kwenye lindi la umaskini.

“Serikali inatoa fedha kwa kaya maskini ili ziweze kujishughulisha na ufugaji, kilimo na ujasiriamali na baada ya muda ziweze kuondokana na umaskini” Mhe. Ndejembi amefafanua. 

Kuhusiana na Kijiji cha Msangano ambacho hakijanufaika na Mpango wa TASAF toka uanze, Mhe. Ndejembi amewaahidi wananchi wa kijiji hicho kuwa, ifikapo mwezi Julai kaya maskini kijijini hapo zitaanza kunufaika na TASAF.

Sanjali na hilo, Mhe. Ndejembi amewataka Watendaji wa Serikali kutokata fedha za ruzuku za wanufaika kwa ajili ya kuchangia huduma za Mfuko wa Afya ya Jamii (CHF) na michango mingineyo kwani fedha hiyo ni yake kwa ajili ya kuboresha maisha yake. 

Mhe. Ndejembi amesisitiza kuwa, kama kuna mchango wowote ni wa hiari hivyo si lazima akatwe ruzuku yake, na kuongeza kuwa mnufaika apewe fursa ya kuitumia fedha kujiendeleza kiuchumi katika ufugaji au kilimo ili akifuga na kuvuna achangie kwa hiari yake mwenyewe. 

Aidha, Mhe. Ndejembi amewahakikishia wananchi wa vijiji vya Msangano, Nkala, Chiwanda na maeneo mengine kuwa, Serikali inayoongozwa na Mhe. Rais Samia Suluhu Hassan itaendelea kuzijali kaya maskini kwa kuzipatia ruzuku, hivyo amezitaka kutumia vizuri ruzuku hizo ili kuunga mkono jitihada za Serikali katika kuboresha maisha ya kaya maskini nchini. 

Mhe. Ndejembi amefanya ziara ya kikazi ya siku moja Wilayani Momba kwa lengo la kukagua utekelezaji wa Mpango wa Kunusuru Kaya Maskini wilayani humo, ikiwa ni sehemu ya utekelezaji wa ahadi aliyoitoa hivi karibuni kwa Mbunge wa Jimbo la Momba Mhe. Condesta Sichalwe wakati wa kikao cha Kamati ya Kudumu ya Bunge ya Utawala na Serikali za Mitaa.

Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deogratius Ndejembi akisisitiza jambo kwa Kaimu Meneja Uhawilishaji Fedha wa TASAF Bw. Selemani Masala, wakati wa ziara yake ya kikazi ya kukagua utekelezaji wa Mpango wa TASAF katika Kijiji cha Nkala Wilayani Momba. 

Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deogratius Ndejembi akizungumza na wananchi na wanufaika wa TASAF Kijiji cha Nkala wilayani Momba wakati wa ziara yake ya kikazi kukagua utekelezaji wa Mpango wa Kunusuru Kaya Maskini katika kijiji hicho.

Mbunge wa Jimbo la Momba, Mhe. Condesta Sichalwe akitoa neno la utangulizi kabla ya kumkaribisha Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deogratius Ndejembi kuzungumza na wananchi, kijiji cha Msangano wilayani Momba wakati wa ziara yake ya kikazi kukagua utekelezaji wa Mpango wa TASAF katika kijiji hicho. 

Baadhi ya wananchi Kijiji cha Msangano Wilayani Momba wakimsikiliza Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deogratius Ndejembi (hayupo pichani) wakati wa ziara ya kikazi ya Naibu Waziri huyo yenye lengo la kukagua utekelezaji wa Mpango wa TASAF katika kijiji hicho.

Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deogratius Ndejembi akimpatia fedha mnufaika wa TASAF Kijiji cha Nkala Wilayani Momba, Bi. Sarafina Simfukwe mara baada ya kumtembelea nyumbani kwake na kuona maendeleo aliyoyapata kutokana na ruzuku anayoipokea kutoka TASAF. 

 

Baadhi ya wananchi Kijiji cha Nkala Wilayani Momba wakinyoosha mikono hewani kuashiria ni wanufaika wa TASAF wakati wa ziara ya kikazi ya Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deogratius Ndejembi (hayupo pichani) yenye lengo la kukagua utekelezaji wa Mpango wa TASAF katika kijiji hicho.

 

SALAMU ZA PONGEZI