UTUMISHI, BODI YA MIKOPO ZANZIBAR ZASAINI MAKUBALIANO KUBADILISHANA TAARIFA

Na Eric Amani, Mji wa Serikali Mtumba.

Ofisi ya Rais, Menejimenti ya Utumishi wa Umma na Utawala Bora imesaini makubaliano ya ushirikiano na Bodi ya Mikopo ya Elimu ya Juu Zanzibar (ZHELB) kwa ajili ya kuwezesha kubadilishana taarifa kati ya Mfumo wa Taarifa za Watumishi wa Umma wa Tanzania Bara na mfumo wa Bodi hiyo.

Makubaliano hayo yamesainiwa leo, Agosti 12, 2026 na Katibu Mkuu Ofisi ya Rais, Menejimenti ya Utumishi wa Umma na Utawala Bora Bw. Juma Selemani Mkomi na Mkurugenzi Mtendaji wa Bodi ya Mikopo ya Wanafunzi wa Elimu ya Juu Zanzibar Ndugu Umrat Mohamed.

Akizungumza wakati wa hafla ya utiaji saini, Katibu Mkuu Mkomi amesema hatua hiyo ni sehemu ya jitihada za Serikali za kutumia mifumo ya kidijitali kuboresha usimamizi wa taarifa na utoaji wa huduma kwa Watumishi wa Umma.

Amesema kubadilishana taarifa hizo kutasaidia kubaini wanufaika wa mikopo ambao ni watumishi wa umma na kuwezesha wale wenye madeni ya mikopo kutekeleza wajibu wao wa kurejesha fedha walizogharamiwa na Serikali.

“Utaratibu huu utasaidia kuhakikisha taarifa za watumishi wanaonufaika na mikopo zinapatikana kwa usahihi na kwa wakati, jambo litakalorahisisha urejeshaji wa mikopo na kuimarisha usimamizi wa fedha za Serikali,” amesema Mkomi.

Kwa upande wake, Naibu Katibu Mkuu, Wizara ya Elimu na Mafunzo ya Amali Zanzibar, Dkt. Mwanakhamis A. Ameir, ameishukuru Ofisi ya Utumishi kwa kuwezesha hatua hiyo, akieleza kuwa ushirikiano huo utasaidia kuimarisha mifumo ya taarifa na usimamizi wa mikopo ya elimu ya juu Zanzibar.

Amesema kuunganishwa kwa mifumo hiyo kutarahisisha upatikanaji na uhakiki wa taarifa za wanufaika, hivyo kuongeza ufanisi katika usimamizi wa mikopo na urejeshaji wake.

Makubaliano hayo yanatarajiwa kuimarisha ushirikiano wa Taasisi hizo katika usimamizi wa taarifa, kuongeza usahihi wa taarifa za wanufaika wa mikopo na kuwezesha huduma kutolewa kwa haraka, uwazi na ufanisi zaidi, sambamba na kuimarisha matumizi ya mifumo ya kidijitali katika utendaji wa Serikali.

Hatua hiyo pia inaweka msingi wa mifumo ya taarifa za watumishi wa umma wa Tanzania Bara na Zanzibar kuwasiliana na kubadilishana taarifa kwa ufanisi, kwa kuzingatia taratibu za usalama na usiri wa taarifa.

Katibu Mkuu Ofisi ya Rais - UTUMISHI Bw. Juma Mkomi na Mkurugenzi Mtendaji Bodi ya Mikopo ya Elimu ya Juu Zanzibar Bi. Umrat S. Mohamed wakati wa utiaji saini ya makubaliano ya ushirikiano kwenye masuala ya mikopo ya elimu ya juu kwa watumishi wa umma Agosti 12, 2026 Mtumba Jijini Dodoma

Katibu Mkuu Ofisi ya Rais - UTUMISHI Bw. Juma Mkomi akiwa na Mkurugenzi Mtendaji wa Bodi ya Mikopo elimu ya Juu ya Wanafunzi wa Ellimu ya Juu Zanzibar Bi. Umrat S. Mohamed wakati wa kikao cha uwekaji saini ya makubaliano ya ushirikiano kwenye masuala ya mikopo ya elimu ya juu kwa watumishi wa umma Agosti 12, 2026 Mtumba Jijini Dodoma

Naibu Katibu Mkuu, Wizara ya Elimu na Mafunzo ya Amali Zanzibar, Dkt. Mwanakhamis A. Ameira (Aliyenyoosha Mikono) akizungumza na Katibu Mkuu Ofisi ya Rais - UTUMISHI Bw. Juma Mkomi na Viongozi wengine wakati kikao cha kutia saini ya makubaliano ya ushirikiano kwenye masuala ya mikopo ya elimu ya juu kwa watumishi wa umma Agosti 12, 2026 Mtumba Jijini Dodoma.

Katibu Mkuu Ofisi ya Rais - UTUMISHI Bw. Juma Mkomi Agosti 12, 2026 akizungumza na Viongozi kutokea Wizara ya Elimu na Mafunzo ya Amali Zanzibar, Bodi ya Mikopo ya Elimu ya Juu Zanzibar pamoja na wakurugenzi Kutokea Ofisi ya Rais - UTUMISHI mara baada ya kutia saini ya makubaliano ya ushirikiano kwenye masuala ya mikopo ya elimu ya juu kwa watumishi wa umma Agosti 12, 2026 Mtumba Jijini Dodoma

Picha ya Pamoja ya Katibu Mkuu Ofisi ya Rais - UTUMISHI Bw. Juma Mkomi (katikati) akiwa na Mkurugenzi Mtendaji wa Bodi ya Mikopo elimu ya Juu ya Wanafunzi wa Ellimu ya Juu Zanzibar Bi. Umrat S. Mohamed (Kulia) na Naibu Katibu Mkuu Wizara ya Elimu na Mafunzo ya Amali Zanzibar Dr. Mwanakhamis Ameir (kushoto) na baadhi ya wakurungezi kutokea Ofisi ya Rais - UTUMISHI mara baada ya kutia saini ya makubaliano ya ushirikiano kwenye masuala ya mikopo ya elimu ya juu kwa watumishi wa umma Agosti 12, 2026 Mtumba Jijini Dodoma