WATUMISHI WAASWA KUZINGATIA SHERIA, KANUNI NA TARATIBU WANAPOTIMIZA WAJIBU WAO

Na. Lusungu Helela -Dodoma

Ofisi ya Rais, Menejimenti ya Utumishi wa Umma na Utawala Bora imewataka Watumishi wa Umma kutimiza majukumu yao kwa kuzingatia Sheria, Kanuni na Taratibu huku wakisistizwa kutambua haki zao za msingi wanazostahili kama Watumishi wa Umma.

Afisa Utumishi Mkuu, Bw. Elibariki Funga akiwasilisha mada kwa niaba ya Mkurugenzi wa Idara ya Utawala na Usimamizi wa Rasilimaliwatu ametoa kauli hiyo leo Jumatatu Desemba 23, 2024 katika ofisi hiyo iliyopo Mji wa Serikali Mtumba, jijini Dodoma wakati akitoa  mafunzo ya haki na wajibu kwa  Watumishi wa Umma nchini,  ikiwa ni muendelezo wa kutoa mafunzo elekezi ya kila wiki kwa Watumishi  hao  kwa  lengo la  kuboresha utendaji kazi kwa Watumishi wa Umma nchini.

Amesema ni wajibu wa kila Mtumishi kutambua haki zake ikiwemo stahili zake kama Mtumishi wa Umma pamoja na likizo huku akisisitiza haki lazima iende sambamba na kutimiza wajibu wa kutoa huduma bora kwa wananchi.

Amesema endapo Watumishi wa Ofisi hiyo wataweza kufahamu vizuri haki zao wataweza kuwajibika ipasavyo ili kuendana na maono ya Rais wa Jamhuri ya Muungano wa Tanzania, Mhe. Dkt. Samia Suluhu Hassan.

Afisa Utumishi Mkuu, Bw. Elibariki Funga (aliyesimama) akiwasilisha mada kuhusu Haki katika Utumishi wa Umma wakati wa mafunzo ya kuwajengea uwezo Watumishi wa Ofisi ya Rais-UTUMISHI na Utawala Bora yanayofanyika kila Jumatatu katika ofisi hiyo iliyopo Mji wa Serikali Mtumba, jijini Dodoma.

Katibu Mkuu, Ofisi ya Rais, Menejimenti ya Utumishi wa Umma, Bw. Juma Mkomi (wa kwanza kushoto) akifuatilia wasilisho kuhusu Haki katika Utumishi wa Umma wakati wa mafunzo ya kuwajengea uwezo Watumishi wa Ofisi ya Rais-UTUMISHI na Utawala Bora yanayofanyika kila Jumatatu katika ofisi hiyo iliyopo Mji wa Serikali Mtumba, jijini Dodoma.

Mkurugenzi wa Utawala na Usimamizi wa Rasilimaliwatu, Ofisi ya Rais, Menejimenti ya Utumishi wa Umma na Utawala Bora, Bw. Musa Magufuli (aliyesimama) akizungumza wakati wa mafunzo ya kuwajengea uwezo watumishi wa ofisi hiyo yaliyofanyika katika Mji wa Serikali Mtumba, jijini Dodoma.

Baadhi ya Watumishi wa Ofisi ya Rais-UTUMISHI na Utawala Bora wakifuatilia mafunzo ya kuwajengea uwezo watumishi wa Ofisi ya Rais-UTUMISHI na Utawala Bora yanayofanyika kila Jumatatu katika ofisi hiyo iliyopo Mji wa Serikali Mtumba, jijini Dodoma. Wengine ni Wakurugenzi wa Idara na vitengo mbalimbali wa ofisi hiyo.

Mkurugenzi wa Idara ya Utawala na Utumishi wa Umma, Bi. Felista Shuli akifafanua jambo wakati wa mafunzo ya kuwajengea uwezo watumishi wa Ofisi ya Rais-UTUMISHI na Utawala Bora yanayofanyika kila Jumatatu katika ofisi hiyo iliyopo Mji wa Serikali Mtumba, jijini Dodoma.

Mkurugenzi wa Kitengo cha Huduma za Sheria, Bi. Hilda Kabisa (aliyesimama) akijibu hoja kuhusu sheria wakati wa mafunzo ya kuwajengea uwezo watumishi hao kuhusu Haki katika Utumishi wa Umma yaliyofanyika katika ofisi hiyo iliyopo Mji wa Serikali Mtumba, jijini Dodoma.

Sehemu ya Wakurugenzi, Wakurugenzi Wasaidizi na Watumishi wa Ofisi ya Rais-UTUMISHI na Utawala Bora wakimsikiliza Afisa Utumishi Mkuu kutoka ofisi hiyo Bw. Elibariki Funga (hayupo pichani) wakati akiwasilisha mada kuhusu Haki katika Utumishi wa Umma kwenye mafunzo ya kuwajengea uwezo Watumishi wa Ofisi hiyo iliyopo Mji wa Serikali Mtumba, jijini Dodoma.

NAIBU WAZIRI SANGU AWANYOOSHEA KIDOLE WATUMISHI WA UMMA WAZEMBE, ASISITIZA WABADILIKE HARAKA

Na: Mwandishi Wetu - Dodoma 

Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deus Sangu amesema ajira ya kudumu Serikalini imekuwa ikisababisha watumishi wa umma kuwa wazembe na kukaa bila kufanya kazi wakiamini ikifika mwisho wa mwezi watapata mshahara jambo ambalo ni kinyume cha Sheria, Kanuni na Taratibu za Utumishi wa Umma.

Mhe. Sangu ametoa  kauli hiyo leo Desemba 19, 2024  jijini Dodoma  wakati akifunga kikao kazi cha siku tatu cha  Wakuu wa Idara za Utawala na Usimamizi wa Rasilimaliwatu katika Utumishi wa Umma.

Amesema masharti ya  ajira ya kudumu na mafao  Serikalini kwa Watumishi wa Umma yanawaharibu watumishi ambapo wamejikuta wakifanya kazi kwa mazoea bila kuchukuliwa hatua licha ya kukiuka  Sheria, Taratibu na Kanuni jambo ambalo linaweza kuisababishia serikali hasara kubwa.

Mhe. Sangu amesema katika ziara aliyoifanya kwenye baadhi ya mikoa amebaini changamoto hizo hasa katika Mamlaka za Serikali za Mitaa ambapo kuna baadhi ya maeneo amekuta Watendaji wa Kata na Vijiji wakifanya kazi kama miungu watu bila kuchukuliwa hatua za nidhamu licha ya kulewa asubuhi mpaka jioni huku wananchi wakikosa huduma.

"Nimefika moja ya eneo ambalo Mtendaji wa Kijiji na Kata analewa kuanzia asubuhi mpaka jioni siku zote za kazi, wananchi wanahitaji huduma hawapati, ukimuuliza mwajiri anasema ndio kawaida yake tumeshamzoea, katika utumishi wa umma hakuna mazoea ya namna hiyo na haikubaliki hata kidogo," alisema Mhe. Sangu.

Pia, alizitaja changamoto nyingine alizokutana nazo katika maeneo hayo kuwa ni uzembe , vitendo vya rushwa, ulevi uliokithiri, kutoa  lugha zisizofaa, unyanyasaji, uonevu na ubinafsi hasa katika Mamlaka za Serikali za Mitaa, kutopandishwa vyeo, kutolipa malimbikizo ya mishahara, na suala la uhamisho.

Amesema, wamebaini kuwa changamoto zote hizo zimesababishwa na watumishi wazembe, wabinafsi na wasiotaka kuwajibika kwa weledi katika utekelezaji wa  majukumu yao.

Akizunguzia changamoto ya uhamisho, Naibu Waziri huyo amesema kuwa mtumishi anahamishwa zaidi ya mara sita ndani ya miaka saba, bila kulipwa madai yake ya uhamisho jambo ambalo linasababisha malimbikizo makubwa ya madai ambayo halmashauri husika haiwezi kuyalipa hivyo kuomba msaada Serikali Kuu na kuisababishia Serikali hasara kubwa.

"Unaweza kukuta madai yanafikia robo tatu ya mapato ya ndani ya halmashauri hivyo kusababisha ugumu wa kuyalipa, niwaase mtekeleze majukumu yenu kwa waledi, mtumishi anapohamishwa hakikisheni analipwa kwa wakati si kulimbikiza madai," amesistiza .

Awali, Katibu Mkuu Ofisi ya Rais (UTUMISHI), Bw. Juma Mkomi akizungumzia utekelezaji wa maagizo ya Waziri Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene kuhusu watumishi waliobainika kughushi barua amesema, tayari ameshachukua hatua na  kuwaandikia barua waajiri wote kuzichunguza kwa siri barua zote wanazozipokea na kubaini kama ni halisi kutoka Ofisi ya Rais-UTUMISHI.

Katibu Mkuu Mkomi amesema, zipo barua ambazo zinatengenezwa mtaani na kuwekewa nembo ya Ofisi ya Rais-UTUMISHI, hivyo katika kukomesha vitendo hivyo visivyokuwa na maadili onyo kali linatolewa kwa wanaohusika na vitendo hivyo na hatua zitachukuliwa dhidi yao.

Kikao kazi hicho kimewashirikisha Wakuu wa Idara za Utawala na Usimamizi wa Rasilimaliwatu kutoka Wizara, Idara Zinazojitegemea, Wakala za Serikali, Mashirika na Taasisi za Umma, Sekretarieti za Mikoa na Mamlaka za Serikali za Mitaa.

Kaulimbi ya kikao kazi hicho ni “Kusimamia Sera na Sheria za Utumishi wa Umma Kupitia Mifumo ya Usimamizi wa Rasilimaliwatu na Utawala wa Kidijitali Iliyoboreshwa.”

Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deus Sangu akizungumza na Wakuu  wa Idara za Utawala na Usimamizi wa Rasilimaliwatu (hawapo pichani) wakati akifunga kikao kazi kilichofanyika kuanzia tarehe 17-19 Disemba, 2024 katika Ukumbi wa Dodoma Jiji uliopo Mji wa Serikali Mtumba.

Baadhi ya Wakuu wa Idara za Utawala na Usimamizi wa Rasilimaliwatu wakimsikiliza Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deus Sangu (hayupo pichani) wakati akifunga kikao kazi cha Viongozi hao kilichofanyika Ukumbi wa Dodoma Jiji uliopo Mji wa Serikali Mtumba.

Katibu Mkuu, Ofisi ya Rais-UTUMISHI, Bw. Juma Mkomi akitoa maelezo ya awali kabla ya kumkaribisha Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deus Sangu (hayupo pichani) kuzungumza na kufunga kikao kazi cha Wakuu wa Idara za Utawala na Usimamizi wa Rasilimaliwatu kilichofanyika katika Ukumbi wa Dodoma Jiji uliopo Mji wa Serikali Mtumba.

Baadhi ya Wakurugenzi wa Idara na Vitengo kutoka Ofisi ya Rais, Menejimenti ya Utumishi wa Umma na Utawala Bora wakifuatilia hotuba ya Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deus Sangu wakati akizungumza na Wakuu wa Idara za Utawala na Usimamizi wa Rasilimaliwatu (hawapo pichani) wakati akifunga kikao kazi hicho kilichofanyika kuanzia tarehe 17-19 Disemba, 2024 katika Ukumbi wa Dodoma Jiji uliopo Mji wa Serikali Mtumba.

Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deus Sangu akimkabidhi tuzo Mkuu wa Idara ya Rasilimaliwatu wa Taasisi ya Moyo Jakaya Kikwete, Bw. Abdulrahman Muya baada ya taasisi hiyo kuwa mshindi wa pili usimamizi bora wa Rasilimaliwatu. Wa kwanza kushoto ni Katibu Mkuu, Ofisi ya Rais-UTUMISHI, Bw. Juma Mkomi na wa kwanza kulia ni Mkurugenzi wa Idara ya Utawala na Utumishi wa Umma, Bi. Felista Shuli.

Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deus Sangu (katikati) akijiandaa kukabidhi tuzo kwa washindi bora wa ofisi zilizosimamizi Rasilimaliwatu katika utendajikazi. Kulia kwake ni Katibu Mkuu, Ofisi ya Rais-UTUMISHI, Bw. Juma Mkomi na kushoto kwake ni Mkurugenzi wa Idara ya Utawala na Utumishi wa Umma, Bi. Felista Shuli.

Baadhi ya Wakuu wa Idara za Utawala na Usimamizi wa Rasilimaliwatu wakimsikiliza Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deus Sangu (hayupo pichani) wakati akifunga kikao kazi cha Viongozi hao kilichofanyika Ukumbi wa Dodoma Jiji uliopo Mji wa Serikali Mtumba.

 

KILICHOJIRI KWENYE KIKAO KAZI CHA WAKUU WA IDARA YA UTAWALA NA USIMAMIZI WA RASILIMALI WATU SERIKALINI

 

WAZIRI SIMBACHAWENE ATOA MAAGIZO KUMI YA KIMKAKATI KWA WAKUU WA IDARA ZA UTAWALA NA USIMAMIZI WA RASILIMALIWATU SERIKALINI

Na Mwandishi Wetu

Tarehe 17 Disemba, 2024

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene ametoa maagizo 10 kwa Wakuu wa Idara za Utawala na Usimamizi wa Rasilimaliwatu Serikalini.

Maagizo hayo ni pamoja na kuzitaka Mamlaka za nidhamu kuchukua hatua stahiki na kwa wakati kwa watumishi wote waliobainika kuwa na barua za kughushi na walioshiriki katika mchakato wa kughushi barua za uhamisho kwa tarehe zilizobainishwa katika barua za maelekezo ikiwa ni pamoja na Waajiri kuacha kuwasilisha na kupitisha barua za maombi ya masuala mbalimbali ya kiutumishi ambayo kwa sasa yanashughulikiwa kupitia Mifumo.

Waziri Simbachawene, ametoa maagizo hayo leo jijini Dodoma wakati akifungua kikao cha kazi cha siku tatu kwa Wakuu wa Idara za Utawala na Usimamizi wa Rasilimaliwatu chenye lengo la kuboresha utendaji kazi kwa Watumishi wa Umma Serikalini.

Amesema kwa nafasi walizonazo Wakurugenzi hao kwenye Taasisi wanazotoka ni jicho la Ofisi anayoingoza katika kusimamia utekelezaji wa Sera za Utawala, Maadili, Serikali Mtandao, Makazi ya Watumishi wa Umma, Kumbukumbu na Nyaraka za Taifa na Usimamizi wa Rasilimaliwatu.

"Katika kutekeleza Sera tajwa hapo juu, mnawajibika kusimamia ukamilishaji wa taratibu za Ajira, mipango ya rasilimaliwatu, utendaji kazi, uendelezaji wa rasilimaliwatu na mifumo mbalimbali ya kiutumishi ambayo imesanifiwa kwa ajili ya kuwawezesha kutekeleza majukumu yenu. Mifumo hiyo ni pamoja na Mfumo wa Taarifa za Kiutumishi na Mishahara (e-Watumishi), 

Pia Mfumo wa Huduma kwa Watumishi wa Umma (ess) ambao una madirisha muhimu ya e-Utendaji, e-Uhamisho, e-Mikopo na e-Likizo. Vilevile, Mhe. Simbachawene amewafahamisha kuwa wana jukumu la kusimamia Maadili, nidhamu, utekelezaji wa Miundo na Mifumo ya uendeshaji wa utoaji huduma ili kuwa na Utumishi wa Umma wenye tija. 

Katika agizo lake la pili Waziri Simbachawene amemuagiza Katibu Mkuu, UTUMISHI kutoendelea kufanyia kazi maombi yote yanayowasilishwa katika Ofisi ya Rais, Menejimenti ya Utumishi wa Umma na Utawala Bora nje ya Mifumo iliyoanza kufanya kazi ili kuhakikisha Mifumo hiyo inatumika ipasavyo.

"Agizo langu la Tatu, nawaelekeza Waajiri wote kuhakikisha mnajiunga na kutumia kikamilifu Mifumo ya Kiutumishi na Uwajibikaji ambayo imesanifiwa na Ofisi ya Rais, Menejimenti ya Utumishi wa Umma na Utawala Bora na kuzinduliwa na Mhe. Waziri Mkuu wa Jamhuri ya Muungano wa Tanzania Mhe. Kassim Majaliwa mnamo tarehe 23 Juni, 2024," amesema Mhe. Simbachawene.

Waziri Simbachawene katika agizo lake la Nne amewataka waajiri wote kuhakikisha wanasafisha taarifa za watumishi zilizopo katika Mfumo Jumuishi wa taarifa za kiutumishi na mishahara (e-Watumishi) kwa ajili ya kuwezesha utoaji uamuzi sahihi wa masuala mbalimbali ya kiutumishi

"Agizo langu la Tano, nawataka Wakuu wa Idara za Utawala na Usimamizi wa Rasilimaliwatu wote mhakikishe mnasimamia utekelezaji wa Mifumo kwa kuzingatia maelekezo yanayotolewa mara kwa mara na Ofisi ya Rais, Menejimenti ya Utumishi wa Umma na Utawala Bora," amesema Mhe. Simbachawene.

Mhe. Simbachawene katika agizo lake la Sita amewataka Waajiri kuwa wabunifu na kutafuta ufumbuzi ili mipango ya Taasisi zao isiathirike au kutotekelezwa kwa kisingizio cha kukosa fedha;

Pia, Waziri Simbachawene amewaagiza Waajiri hususani wa Mamlaka za Serikali za Mitaa kutenga nafasi za ajira mpya kwa kuzingatia maelekezo ya mwongozo wa maandalizi ya Ikama na Bajeti hususan kwenye maeneo ya rasilimaliwatu yenye upungufu mkubwa na ambayo ni kipaumbele ikiwa ni agizo lake la Saba.

Aidha katika agizo lake la nane, Mhe. Simbachawene amewaagiza Waajiri wote kuwapokea watumishi waliopangiwa vituo vya kazi au waliohamishiwa katika Taasisi zao pamoja na kuwachukuliwa hatua stahiki watumishi wenye utendaji kazi usioridhisha kwa mujibu wa Sheria, Kanuni, Taratibu na Miongozo ya utumishi wa umma.

Waziri ametoa agizo la Tisa na la Kumi akiwataka Waajiri wote kushughulikia ujazaji wa nafasi za uongozi kwa kuzingatia Sheria, Kanuni na Taratibu na kuwaandaa watumishi wao na mabadiliko kwa kuwaandalia mafunzo yenye kukidhi matarajio ya nchi yetu, pamoja na mazingira yanayotuzunguka ili wakabiliane na mabadiliko yanayoendelea kwa kasi na teknolojia.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene akizungumza na Wakuu  wa Idara za Utawala na Usimamizi wa Rasilimaliwatu (hawapo pichani) wakati akifungua kikao kazi kilichofanyika katika Ukumbi wa Dodoma Jiji uliopo Mji wa Serikali Mtumba.

Baadhi ya Wakuu wa Idara za Utawala na Usimamizi wa Rasilimaliwatu wakimsikiliza Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene (hayupo pichani) wakati akifungua kikao kazi cha Viongozi hao kilichofanyika katika Ukumbi wa Dodoma Jiji uliopo Mji wa Serikali Mtumba. Wengine ni Viongozi mbalimbali.

Naibu Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deus Sangu akitoa maelezo ya awali kabla ya kumkaribisha Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene (hayupo pichani) kuzungumza na Wakuu wa Idara za Utawala na Usimamizi wa Rasilimaliwatu katika kikao kazi cha Viongozi hao kilichofanyika katika Ukumbi wa Dodoma Jiji uliopo Mji wa Serikali Mtumba.

Katibu Mkuu, Ofisi ya Rais-UTUMISHI, Bw. Juma Mkomi akitoa utambulisho wa Viongozi waliohudhuria kikao kazi cha Wakuu wa Idara za Utawala na Usimamizi wa Rasilimaliwatu (hawapo pichani) kilichofanyika katika Ukumbi wa Dodoma Jiji uliopo Mji wa Serikali Mtumba.

 

Mkurugenzi wa Idara ya Utawala na Utumishi wa Umma, Bi. Felista Shuli akielezea malengo ya kikao kazi cha Wakuu wa Idara za Utawala na Usimamizi wa Rasilimaliwatu kabla ya Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene (hayupo pichani) kufungua Kikao kazi hicho kilichofanyika katika Ukumbi wa Dodoma Jiji uliopo Mji wa Serikali Mtumba.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene akiwa katika picha ya pamoja na Wakurugenzi wa Idara na Vitengo wa ofisi hiyo mara baada ya kufungua kikao kazi cha Wakuu wa Idara za Utawala na Usimamizi wa Rasilimaliwatu kilichofanyika katika Ukumbi wa Dodoma Jiji uliopo Mji wa Serikali Mtumba. Wengine ni Viongozi mbalimbali waliohudhuria ufunguzi huo.

Katibu Tawala Msaidizi-Utawala na Rasilimaliwatu-Singida, Bw. Stephen Pancras akitoa neno la shukrani kwa Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene (hayupo pichani) baada ya Waziri huyo kufungua kikao kazi cha Wakuu wa Idara za Utawala na Usimamizi wa Rasilimaliwatu kilichofanyika katika Ukumbi wa Dodoma Jiji uliopo Mji wa Serikali Mtumba.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene akiwa katika picha ya pamoja na sehemu ya Wakuu wa Idara za Utawala na Usimamizi wa Rasilimaliwatu baada ya kufungua kikao kazi cha viongozi hao kilichofanyika katika Ukumbi wa Dodoma Jiji uliopo Mji wa Serikali Mtumba. Wengine ni Viongozi mbalimbali waliohudhuria ufunguzi huo.

WATUMISHI OFISI YA RAIS-UTUMISHI WASISITIZWA KUZINGATIA UANDISHI WA NYARAKA ZA SERIKALI

 Na. Veronica Mwafisi

Tarehe 16 Desemba, 2024

Watumishi wa Ofisi ya Rais, Menejimenti ya Utumishi wa Umma na Utawala Bora, wamesisitizwa kuzingatia uandishi wa Nyaraka za Serikali ikiwemo barua, dokezo na taarifa mbalimbali ili kurahisisha mawasiliano ndani ya ofisi baina ya Idara na Vitengo.

Mchambuzi kazi, Idara ya Usimamizi wa Taasisi, Ofisi ya Rais-UTUMISHI na Utawala Bora, Bw. Macdonald Kiwia ameyasema hayo leo tarehe 16 Desemba, 2024 wakati akiwasilisha mada kuhusu Mwongozo wa Uandishi wa Nyaraka mbalimbali za Serikali wakati wa mafunzo yaliyolenga kuwajengea uwezo Viongozi na Watumishi wa ofisi katika Mji wa Serikali Mtumba, jijini Dodoma.

Aidha, Bw. Kiwia ametoa wito kwa watumishi hao kuzingatia Sheria, Kanuni Taratibu na Miongozo mbalimbali ya uandishi wa Nyaraka za Serikali ili kuboresha utendajikazi kwa watumishi hao na watumishi wa umma nchini kote. 

Kwa upande wake, Mkurugenzi wa Idara ya Utawala na Usimamizi wa Rasilimaliwatu, Bw. Musa Magufuli amewasisitiza watumishi wa ofisi hiyo kuhudhuria mafunzo hayo bila kukosa kila siku ya Jumatatu kwa lengo la kuwajengea uwezo watumishi wote na kuwa na uelewa wa pamoja wa matumizi sahihi ya masuala mbalimbali kuhusu Utumishi wa Umma.

Mkurugenzi wa Idara ya Utawala na Usimamizi wa Rasilimaliwatu, Ofisi ya Rais, Menejimenti ya Utumishi wa Umma na Utawala Bora, Bw. Musa Magufuli akizungumza na watumishi wa ofisi hiyo wakati akihitimisha mafunzo yaliyolenga kuwajengea uwezo watumishi hao katika masuala ya Uandishi wa Nyaraka za Serikali yaliyofanyika katika ofisi hiyo iliyopo Mji wa Serikali Mtumba, jijini Dodoma.

Katibu Mkuu, Ofisi ya Rais, Menejimenti ya Utumishi wa Umma, Bw. Juma Mkomi (mstari wa pili, wa tatu kutoka kulia) akifuatilia mafunzo yaliyolenga kuwajengea uwezo Viongozi na watumishi wa ofisi hiyo kuhusu masuala ya Uandishi wa Nyaraka za Serikali yaliyofanyika katika Mji wa Serikali Mtumba, jijini Dodoma.

Mchambuzi kazi, Idara ya Usimamizi wa Taasisi, Ofisi ya Rais-UTUMISHI na Utawala Bora, Bw. Macdonald Kiwia akiwasilisha mada kuhusu viwango mahsusi vya uandishi wa dokezo wakati wa mafunzo yaliyolenga kuwajengea uwezo Viongozi na watumishi wa ofisi hiyo kuhusu masuala ya Uandishi wa Nyaraka za Serikali yaliyofanyika katika Mji wa Serikali Mtumba, jijini Dodoma.

Sehemu ya watumishi wa Ofisi ya Rais-UTUMISHI na Utawala Bora wakifuatilia mada mbalimbali kuhusu Uandishi wa Nyaraka za Serikali  wakati wa mafunzo yaliyolenga kuwajengea uwezo Viongozi na watumishi wa ofisi hiyo yaliyofanyika katika Mji wa Serikali Mtumba, jijini Dodoma.

Sehemu ya Wakurugenzi na Watumishi wa Ofisi ya Rais-UTUMISHI na Utawala Bora wakifuatilia mada mbalimbali kuhusu Uandishi wa Nyaraka za Serikali wakati wa mafunzo yaliyolenga kuwajengea uwezo Viongozi na watumishi wa ofisi hiyo yaliyofanyika katika Mji wa Serikali Mtumba, jijini Dodoma.

Sehemu ya Watumishi wa Ofisi ya Rais, Menejimenti ya Utumishi wa Umma na Utawala Bora, wakifuatilia mafunzo ya kuwajengea uwezo watumishi hao kuhusu Uandishi wa Nyaraka za Serikali yaliyofanyika katika ofisi hiyo iliyopo katika Mji wa Serikali Mtumba, jijini Dodoma.