WHI IMELETA MAPINDUZI MAKUBWA KWA WATUMISHI WA UMMA KUMILIKI NYUMBA -Mhe. Simbachawene

            Na Mwandishi Wetu - Dodoma 

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene amesema Watumishi Housing Investments (WHI) ni taasisi ambayo imefanya mambo makubwa kwani tangu kuanzishwa kwake limeleta mapinduzi makubwa kwa Watumishi wa Umma kuweza kumiliki nyumba bora kwa masharti nafuu, hatua inayolenga kuboresha hali ya maisha na kuongeza ufanisi kazini.

Mhe. Simbachawene ametoa kauli hiyo leo katika eneo la nyumba zilizojengwa na WHI Njedengwa jijini Dodoma wakati akimkaribisha Makamu wa Rais wa Jamhuri ya Muungano wa Tanzania, Mhe. Dkt. Philip Mpango kwa ajili ya kuzindua Mpango wa Makazi kwa Watumishi wa Umma. 

Mhe. Simbachawene amesema WHI imefanikiwa kutekeleza makazi kwa Watumishi wa Umma jumla ya nyumba 1006 katika mikoa 19 nchini lengo likiwa ni kutatua changamoto ya makazi inayowakabili Watumishi hao hususan wa kipato cha chini.

Amesema mpango huo ulibuniwa ili kuwapa nafuu watumishi kumiliki nyumba hizo ikizingatiwa kuwa katika kipindi cha nyuma haikuwa rahisi kwa watumishi hao kumiliki nyumba kutokana na makampuni mengi yanayojihusisha na ujenzi wa nyumba kujiendesha  kibiashara kwa lengo la kupata faida.

Amesema, shabaha kubwa ya WHI ni kujenga nyumba vijijini kwa ajili ya kuwawezesha watumishi wa kipato cha chini wakiwemo Walimu na Wauguzi kuweza kumiliki nyumba pamoja na kujenga maeneo ya mijini ili kuwasaidia watumishi wenye kipato cha chini na ajira mpya kuacha kupanga nyumba mbali na maeneo yao ya kazi.   

Kwa upande wake, Mwenyekiti wa Kamati ya Bunge ya Kudumu ya Uwekezaji na Mitaji ya Umma, Mhe. Augustine Holle amesema WHI ni Taasisi ambayo imekuwa ikijenga nyumba zinazouzika tofauti na Taasisi zingine kutokana na kujenga nyumba hizo kulingana na kipato cha wateja wake ambao ni Watumishi wa Umma

"WHI ni Taasisi makini ambayo imejikita kurahisisha umiliki wa nyumba kwa Watumishi wa Umma kuwa urahisi na endelevu " amesisitiza Mhe. Holle.

Awali, Mkurugenzi Mtendaji wa WHI, Dkt. Fred Msemwa amesema suala la makazi kwa Watumishi wa Umma ni jambo lisiloepukika kwani linachochea ufanisi wa kazi kwa Watumishi hao.

Amesema tangu kuanzishwa kwa taasisi hiyo wamekuwa wakifanya jitihada za kujenga nyumba za Watumishi kwa bei rahisi ili kuwawezesha Watumishi hao kuweza kumiliki nyumba hizo kwa  kuzinunua kwa bei rahisi. 

"Kwa mara ya kwanza haikuwa rahisi, nyumba zilizojengwa licha ya kuwalenga Watumishi lakini walikuwa hawawezi kuzinunua  kutokana gharama yake kuwa juu ila kwa sasa Watumishi wamekuwa wakizifurahia," amesisitiza Dkt. Msemwa. 

Utekelezaji wa Mpango wa Makazi kwa Watumishi wa Umma ni dhamira pana ya Serikali ya Awamu ya Sita chini ya Uongozi wa Rais wa Jamhuri ya Muungano wa Tanzania, Mhe. Dkt. Samia Suluhu Hassan kuhakikisha kuwa kila Mtanzania anapata fursa ya kumiliki makazi bora.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene akizungumza wakati wa hafla ya ufunguzi wa Mpango wa Makazi kwa Watumishi wa Umma kabla ya kumkaribisha mgeni rasmi Makamu wa Rais wa Jamhuri ya Muungano wa Tanzania, Mhe. Dkt. Philip Mpango (hayupo pichani) kuzungumza katika halfa hiyo iliyofanyika katika Nyumba za Watumishi, Njedengwa jijini Dodoma.

Sehemu ya Wakurugenzi wa Ofisi ya Rais, Menejimenti ya Utumishi wa Umma na Utawala Bora wakiwa kwenye hafla ya ufunguzi wa Mpango wa Makazi kwa Watumishi wa Umma iliyofanyika katika Nyumba za Watumishi, Njedengwa jijini Dodoma.

Makamu wa Rais wa Jamhuri ya Muungano wa Tanzania, Mhe. Dkt. Philip Mpango (aliyevaa tai nyekundu) akiwasili eneo la Njedengwa jijini Dodoma kwenye hafla ya ufunguzi wa Mpango wa Makazi kwa Watumishi wa Umma. Kulia kwake ni Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene pamoja na Viongozi mbalimbali.

Naibu Katibu Mkuu, Ofisi ya Rais-UTUMISHI na Utawala Bora, Bw. Xavier Daudi akitoa utambulisho wa Viongozi na wageni walioshiriki kwenye hafla ya ufunguzi wa Mpango wa Makazi kwa Watumishi wa Umma iliyofanyika katika Nyumba za Watumishi, Njedengwa jijini Dodoma.

Makamu wa Rais wa Jamhuri ya Muungano wa Tanzania, Mhe. Dkt. Philip Mpango (wa pili kutoka kulia) akiweka jiwe la msingi kwenye hafla ya ufunguzi wa Mpango wa Makazi kwa Watumishi wa Umma iliyofanyika katika Nyumba za Watumishi, Njedengwa jijini Dodoma. Wa nne kutoka kushoto ni Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene na wa pili kutoka kushoto ni Naibu Waziri wa Ofisi ya Rais-UTUMISHI na Utawala Bora, Mhe. Deus Sangu.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene (wa kwanza kutoka kushoto) akizungumza jambo na Viongozi wa mbalimbali. Kushoto kwake ni Naibu Waziri wa ofisi yake Mhe. Deus Sangu  na wa pili kutoka kulia ni Naibu Katibu Mkuu, Ofisi ya Rais-UTUMISHI na Utawala Bora, Bw. Xavier Daudi.

Sehemu ya Watumishi wa Ofisi ya Rais, Menejimenti ya Utumishi wa Umma na Utawala Bora wakimsikiliza Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene wakati akizungumza katika hafla ya ufunguzi wa Mpango wa Makazi kwa Watumishi wa Umma kabla ya Waziri huyo kumkaribisha mgeni rasmi Makamu wa Rais wa Jamhuri ya Muungano wa Tanzania, Mhe. Dkt. Philip Mpango (hayupo pichani).

Sehemu ya Wakurugenzi na Wakurugenzi Wasaidizi wa Ofisi ya Rais, Menejimenti ya Utumishi wa Umma na Utawala Bora wakiwa kwenye hafla ya ufunguzi wa Mpango wa Makazi kwa Watumishi wa Umma iliyofanyika katika Nyumba za Watumishi, Njedengwa jijini Dodoma.

Wakurugenzi wa Ofisi ya Rais, Menejimenti ya Utumishi wa Umma na Utawala Bora wakiwa kwenye picha ya pamoja na mgeni rasmi Makamu wa Rais wa Jamhuri ya Muungano wa Tanzania, Mhe. Dkt. Philip Mpango (katikati meza kuu aliyekaa) wakati wa hafla ya ufunguzi wa Mpango wa Makazi kwa Watumishi wa Umma iliyofanyika katika Nyumba za Watumishi, Njedengwa jijini Dodoma.

Sehemu ya wageni waalikwa wakiwa kwenye hafla ya ufunguzi wa Mpango wa Makazi kwa Watumishi wa Umma iliyofanyika katika Nyumba za Watumishi, Njedengwa jijini Dodoma.

Mwonekano wa mfano wa nyumba ya Makazi kwa Watumishi wa Umma iliyopo Njedengwa jijini Dodoma.