NAIBU KATIBU MKUU, DAUDI ATAJA SABABU ZA WANANCHI KUTOTUMIA MIFUMO RASMI KUWASILISHA MALALAMIKO SERIKALINI

 

Na. Lusungu Helela- Dodoma

 

Naibu Katibu Mkuu, Ofisi ya Rais, Menejimenti ya Utumishi wa Umma na Utawala  Bora, Bw. Xavier Daudi amesema Wananchi walio wengi wamekuwa wakitumia mitandao ya Kijamii kufikisha malalamiko yao kwenye Taasisi za Serikali kutokana na  baadhi ya  Watumishi wa Umma kuvujisha siri za wateja wao pindi wananchi hao wanapotumia mifumo rasmi kutoa mrejesho

 

Amesema vitendo hivyo vimekuwa vikiwakatisha tamaa Wananchi wenye nia njema ya kuona Serikali inakuwa kinara wa kutoa huduma bora kwa wananchi wake.

 

Bw. Daudi ametoa kauli hiyo leo Jumanne Disemba 3, 2024 jijini Dodoma wakati akifungua mafunzo maalum ya siku tatu kwa Maafisa Mrejesho kuhusu  uendeshaji wa mfumo wa e-Mrejesho katika Ofisi za Umma 

 

Amewataka Maafisa hao kutunza siri za wateja wao ili kuwafanya Wananchi kuwa huru kuwasilisha changamoto zinazowakabili  wakati wowote na mahali popote pasipo kulazimika kutumia mitandao ya kijamii 

Bw. Daudi ameongeza kuwa  Mfumo wa e-Mrejesho unampa fursa  mwananchi  kutuma  malalamiko, pongezi pamoja na maulizo kwa Serikali mahali popote na wakati wowote.

 

Kufuatia hatua hiyo Bw. Daudi amewataka Maafisa hao mara baada ya kurudi katika vituo vyao vya kazi wakahakikishe wanakuwa waadilifu na   wenye kutunza siri za ofisi na za  wateja wao ili kuwafanya wananchi kuwasilisha malalamiko yao kwenye njia rasmi

 

Aidha, Bw. Daudi amewataka Maafisa hao wakaimarishe Madawati au Ofisi za Mrejesho zilizopo katika Taasisi zao  ili kufanikisha ushughulikiaji mrejesho kwa ufanisi na kwa wakati katika Ofisi za Umma kwa vile   wameaminiwa kutekeleza jukumu hilo kwa ufanisi.

 

Kwa upande wake Mkurugenzi wa Usimamzi wa Utawala Bora kutoka USAID/PS3+ awamu ya pili Dkt. Emmanuel Malangalila amesema  wataendelea kushirikiana na Serikali ya Tanzania  katika kuhakikisha mfumo huo unatumika ipasavyo katika Serikali za Mitaa ambako ndiko kuna malalamiko makubwa kutoka kwa wananchi .

 

Mafunzo haya yanalenga kuona huduma zinazotolewa na Serikali zinafurahiwa na wananchi wote bila kujali rangi, kabila, mahali au hali yao ya kiuchumi waliyonayo amesisitiza Dkt. Malangalila

 

Hivi karibuni Tanzania ilipewa  tuzo ya Kimataifa ya ubunifu wa mfumo ya kidijitali wa Mrejesho (e-Mrejesho) nchini Korea Kusini na Shirika la Umoja wa Mataifa (UN) wakati wa Mkutano wa Umoja wa Jukwaa la Umoja wa Mataifa la Tuzo za Utumishi wa Umma (2024 UN Public Service Awards (UNPSF) kutokana na umadhubuti wake.

 

Naibu Katibu Mkuu, Ofisi ya Rais, Menejimenti ya Utumishi wa Umma na Utawala  Bora, Bw. Xavier Daudi akizungumza na Maafisa Mrejesho jijini Dodoma wakati akifungua mafunzo maalum ya siku tatu kwa Maafisa hao kuhusu  uendeshaji wa mfumo wa e-Mrejesho katika Ofisi za Umma

Naibu Katibu Mkuu, Ofisi ya Rais, Menejimenti ya Utumishi wa Umma na Utawala  Bora, Bw. Xavier Daudi akiwa kwenye picha ya pamoja na Maafisa Mrejesho mara baada ya kufungua mafunzo maalum ya siku tatu kwa Maafisa hao kuhusu  uendeshaji wa mfumo wa e-Mrejesho katika Ofisi za Umma

Naibu Katibu Mkuu, Ofisi ya Rais, Menejimenti ya Utumishi wa Umma na Utawala  Bora, Bw. Xavier Daudi akisalimiana na Mkurugenzi wa Usimamizi wa Utawala Bora kutoka USAID/PS3+ , Dkt. Emmanuel Malangalila mara baada ya kuwasili kwa ajili ya  kufungua mafunzo maalum ya siku tatu kwa Maafisa hao kuhusu  uendeshaji wa mfumo wa e-Mrejesho katika Ofisi za Umma, Wa kwanza kushoto ni Mkurugenzi wa Usimamizi wa Maadili, Bi. Leila Mavila 

Mkurugenzi wa Usimamizi wa Utawala Bora kutoka USAID/PS3+ , Dkt. Emmanuel Malangalila akizungumza na Mkurugenzi wa Usimamizi wa Maadili, Bi. Leila Mavila   mara baada ya kuwasili kwenye  mafunzo maalum ya siku tatu kwa Maafisa hao kuhusu  uendeshaji wa mfumo wa e-Mrejesho katika Ofisi za Umma.  

 Mkurugenzi wa Usimamizi wa Maadili, Bi. Leila Mavila akiwa kwenye picha ya pamoja na baadhi ya Wawezeshaji wa Mafunzo   mara baada ya Naibu Katibu Mkuu, Ofisi ya Rais, Menejimenti ya Utumishi wa Umma na Utawala  Bora, Bw. Xavier Daudi  kufungua   mafunzo maalum ya siku tatu kwa Maafisa hao kuhusu  uendeshaji wa mfumo wa e-Mrejesho katika Ofisi za Umma.  

 

Mkurugenzi wa Usimamizi wa Maadili, Bi. Leila Mavila  akizungumza na Maafisa Mrejesho jijini Dodoma kabla Naibu Katibu Mkuu, Ofisi ya Rais, Menejimenti ya Utumishi wa Umma na Utawala  Bora, Bw. Xavier Daudi  kufungua mafunzo maalum ya siku tatu kwa Maafisa hao kuhusu  uendeshaji wa mfumo wa e-Mrejesho katika Ofisi za Umma 

Naibu Katibu Mkuu, Ofisi ya Rais, Menejimenti ya Utumishi wa Umma na Utawala  Bora, Bw. Xavier Daudi akiwa kwenye meza kuu na baadhi ya Wakurugenzi mara baada ya kuwasili kwa ajili ya  kufungua mafunzo maalum ya siku tatu kwa Maafisa hao kuhusu  uendeshaji wa mfumo wa e-Mrejesho katika Ofisi za Umma, Wa pili kushoto ni Mkurugenzi wa Usimamizi wa Maadili, Bi. Leila Mavila 

Naibu Katibu Mkuu, Ofisi ya Rais, Menejimenti ya Utumishi wa Umma na Utawala  Bora, Bw. Xavier Daudi akiwa  na baadhi ya Wakurugenzi mara baada ya kuwasili kwa ajili ya  kufungua mafunzo maalum ya siku tatu kwa Waratibu wa Mrejesho 

MKANDARASI SUMA JKT AHIMIZWA KUKAMILISHA JENGO LA eGA KWA MUJIBU WA MKATABA

 Na. Veronica Mwafisi-Dodoma

Tarehe 03 Desemba, 2024

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene amemtaka Mkandarasi SUMA JKT anayejenga ofisi ya Mamlaka ya Serikali Mtandao (eGA) kukamilisha haraka ujenzi wa jengo la ofisi hiyo kwa mujibu wa mkataba kwa kuwa  eGA ni kiini cha uendeshaji wa Serikali katika kujenga mifumo imara itakayoboresha utoaji wa huduma Serikalini.

Mhe. Simbachawene amesema hayo wakati wa ziara yake ya kikazi katika Mamlaka ya Serikali Mtandao (eGA) iliyolenga kukagua maendeleo ya ujenzi wa jengo la ofisi hiyo jijini Dodoma.

“eGA ni kiini cha uendeshaji wa Serikali mtandao hivyo, tuna wajibu wa kurahisisha utendaji kazi wa taasisi za Serikali kwa lengo la kuboresha huduma zinazotolewa kwa wananchi, hivyo tumieni nguvu nyingi kukamilisha ujenzi huu kwa mujibu wa mkataba na kwa wakati,” Mhe. Simbachawene amesisitiza.

Kwa upande wake, Mkurugenzi Mkuu, Mamlaka ya Serikali Mtandao (e-GA) Mhandisi Benedict Ndomba amesema, Serikali ya Awamu ya Sita kipaumbele chake kikubwa ni kuwa na Serikali ya Kidijitali ili kutoa huduma bora na kwa wakati, hivyo kukamilika kwa jengo hilo kwa wakati kutaisaidia Serikali kufikia malengo yake ya kujenga mifumo imara itakayoboresha utoaji wa huduma Serikalini.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene akizungumza wakati alipofanya ziara ya kikazi katika Mamlaka ya Serikali Mtandao (eGA) iliyolenga kukagua maendeleo ya ujenzi wa jengo la ofisi hiyo jijini Dodoma.

Mkurugenzi Mkuu, Mamlaka ya Serikali Mtandao (e-GA) Mhandisi Benedict Ndomba (wa sita kutoka kulia) akifafanua jambo kwa Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene (aliyevaa tai nyekundu) wakati Waziri huyo alipofanya ziara ya kikazi iliyolenga kukagua maendeleo ya ujenzi wa ofisi ya Mamlaka ya Serikali Mtandao (eGA) jijini Dodoma. Wengine ni Viongozi na Watendaji mbalimbali.

Mwakilishi kutoka ofisi ya Mshauri elekezi (TBA), Bw. Tsere Willium (aliyenyanyua mkono) akimweleza Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene (wa kwanza kulia) maendeleo ya ujenzi wa ofisi ya Mamlaka ya Serikali Mtandao (eGA) unaoendelea wakati Waziri huyo alipofanya ziara ya kukagua maendeleo ya ujenzi wa jengo hilo jijini Dodoma. Katikati ni Mkurugenzi Mkuu, Mamlaka ya Serikali Mtandao (e-GA) Mhandisi Benedict Ndomba

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene akielekea kukagua maendeleo ya ujenzi wa ofisi ya Mamlaka ya Serikali Mtandao (eGA) unaoendelea jijini Dodoma.

Mkurugenzi wa Sera na Mipango, Ofisi ya Rais-IKULU, Bi. Ened Munthali (kulia) akifafanua jambo kwa Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene wakati wa ziara ya kikazi ya Waziri huyo iliyolenga kukagua maendeleo ya ujenzi wa ofisi ya Mamlaka ya Serikali Mtandao (eGA) unaoendelea jijini Dodoma.

Mwonekano wa jengo la ofisi ya Mamlaka ya Serikali Mtandao (eGA) linaloendelea kujengwa jijini Dodoma.

 

WATUMISHI WA OFISI YA RAIS, UTUMISHI WANOLEWA KUHUSU MFUMO WA e-UTENDAJI

 Na. Lusungu Helela -Dodoma

 Mkurugenzi Msaidizi wa Ofisi ya Rais, Menejimenti ya Utumishi wa Umma na Utawala Bora, Bw.  Priscus Tairo ametoa wito kwa watumishi wa Ofisi ya Rais-UTUMISHI kuchukua muda wao kujifunza kwa undani Mfumo  wa Usimamizi wa Utendaji Kazi katika Utumishi wa Umma ili kuwa msaada kwa watumishi walio nje ya Ofisi hiyo ambao wamekuwa wakihitaji kupata mafunzo ya mfumo huo ili waweze kuutekeleza kwa ufanisi.  

 Bw. Tairo ametoa kauli hiyo  leo Jumatatu Disemba 02, 2024 Ofisi ya Rais-UTUMISHI iliyopo Mji wa Serikali Mtumba, jijini Dodoma wakati akitoa  mafunzo ya kuwajengea uwezo Watumishi wa Ofisi hiyo,  ikiwa ni muendelezo wa kutoa mafunzo elekezi ya kila wiki kwa Watumishi  hao  kwa  lengo la  kuboresha utendaji kazi kwa Watumishi wa Umma nchini.

 Bw. Tairo amesema Mfumo huu ni mpya, hivyo unahitaji watumishi wengi wenye uwezo wa kutoa msaada wa kiufundi kwa ukaribu, haraka na ufanisi ili kuleta matokeo yaliyokusudiwa.

 Amesema endapo Watumishi wa Ofisi hiyo wataweza kuufahamu vizuri jinsi mfumo huo wa e- unavyotenda kazi utawawezesha kutoa msaada kwa watumishi wengine wakati wowote na mahali popote lengo likiwa ni  kuifanya Serikali iweze kubaini mwenendo halisi wa utendaji kazi wa watumishi wa umma nchini.

 Kufuatia hatua hiyo, Bw. Tairo  amewataka Watumishi wa Ofisi hiyo kutumia muda wao  mwingi kujinoa katika eneo hilo kwani Watumishi wa nje ya Ofisi hiyo wana imani kubwa na watumishi wa Ofisi hii  bila kujali wanatoka katika idara inayojihusisha na mafunzo hayo.

 

Mwakilishi kutoka Idara ya Utawala na Rasilimali Watu, Charles Shija akizungumza mara baada ya kumalizika mafunzo ya kuwajengea uwezo watumishi wa ofisi hiyo yaliyofanyika katika Mji wa Serikali Mtumba, jijini Dodoma.

Mkurugenzi Msaidizi kutoka Ofisi ya Rais, Menejimenti ya Utumishi wa Umma na Utawala Bora, Bw.  Priscus Tairo akitoa  mafunzo ya kuwajengea uwezo kuhusu Mfumo  wa Usimamizi wa Utendaji Kazi katika Utumishi wa Umma kwa  Watumishi wa Ofisi hiyo, ikiwa ni muendelezo wa kutoa mafunzo elekezi ya kila wiki kwa Watumishi  hao  kwa  lengo la  kuboresha utendaji kazi 

 

 Baadhi  ya Watumishi wa Ofisi ya Rais, Menejimenti ya Utumishi wa Umma na Utawala Bora, wakifuatilia mafunzo ya kuwajengea uwezo watumishi hao katika masuala ya utendaji kazi yaliyofanyika katika ofisi hiyo iliyopo Mji wa Serikali Mtumba, jijini Dodoma.

 

Mtumishi wa Ofisi ya Rais-UTUMISHI na Utawala Bora, Bw.  Dickson Isaya   akiwasilisha hoja wakati wa mafunzo ya kuwajengea uwezo watumishi hao katika utendaji kazi yaliyofanyika katika ofisi hiyo iliyopo Mji wa Serikali Mtumba, jijini Dodoma.

WAZIRI SIMBACHAWENE AKAGUA MAENDELEO YA UJENZI WA KARAKANA YA TGFA AMTAKA MKANDARASI KUKAMILISHA UJENZI KWA VIWANGO NA KWA WAKATI

 Na. Veronica Mwafisi-Dar es Salaam

Tarehe 28 Novemba, 2024

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene amemtaka Mkandarasi SUMA JKT anayejenga Karakana ya Wakala wa Ndege za Serikali (TGFA) kukamilisha haraka ujenzi wa karakana hiyo na kwa viwango ili ianze kutumika kama ilivyokusudiwa.

Mhe. Simbachawene amesema hayo leo tarehe 28 Novemba, 2024 wakati wa kikao kazi chake na Menejimenti ya TGFA na Mkandarasi SUMA JKT mara baada ya kukagua maendeleo ya ujenzi wa karakana hiyo jijini Dar es Salaam.

“Muongeze nguvu ili kazi ifanyike kwa haraka na kwa viwango kulingana na makubaliano yaliyofikiwa, mjitahidi kwa muda uliobakia, vinavyopaswa kukamilika vikamilike kwa wakati,” Mhe. Simbachawene amesisitiza.

Aidha, ameisisitiza Menejimenti ya Wakala hiyo kufanya ufuatiliaji wa mara kwa mara ili kuhakikisha kazi inafanyika kwa haraka na kukamilika kwa wakati. 

“Nitoe msisitizo kwa Menejimenti ya TGFA kufanya ufuatiliaji wa maendeleo ya ujenzi wa Karakana hii, binafsi nitajitahidi kufuatilia kwa karibu sana kwani tunahitaji ukamilike kwa wakati kama ilivyokusudiwa,” Mhe. Simbachawene ameongeza.

Akitoa taarifa ya maendeleo ya utekelezaji wa ujenzi wa kararakana hiyo, Mkurugenzi wa TGFA, Capt. Budodi Budodi amesema, mradi wa Karakana ya Wakala ya Ndege za Serikali umeanza tarehe 7 Mei, 2023 na unarajiwa kukamilika tarehe 6 Mei, 2025.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene akizungumza na Menejimenti ya Wakala ya Ndege za Serikali wakati wa kikao kazi chake na menejimenti hiyo kilicholenga kukagua maendeleo ya ujenzi wa Karakana ya Wakala wa Ndege za Serikali jijini Dar es Salaam.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene (aliyenyoosha kidole) akikagua maendeleo ya ujenzi wa Karakana ya Wakala wa Ndege za Serikali jijini Dar es Salaam. Wengine ni Menejimenti ya Wakala wa Ndege za Serikali.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene akitazama mchoro wa Karakana ya Wakala wa Ndege za Serikali wakati alipotembelea kukagua maendeleo ya ujenzi wa Karakana hiyo jijini Dar es Salaam.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene (kushoto) akiteta jambo na Mwenyekiti wa Bodi ya Ushauri ya Wakala wa Ndege za Serikali Prof. Mhandisi Idrissa Mshoro wakati wa kikao kazi cha Waziri huyo na Menejimenti ya Wakala wa Ndege za Serikali kilicholenga kukagua maendeleo ya ujenzi wa Karakana ya Wakala hiyo jijini Dar es Salaam.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene akielekea kukagua maendeleo ya ujenzi wa Karakana ya Wakala wa Ndege za Serikali jijini Dar es Salaam.

Mkurugenzi wa TGFA, Capt. Budodi Budodi (kulia) akisoma taarifa ya maendeleo ya ujenzi wa Karakana ya Wakala wa Ndege za Serikali wakati wa kikao kazi cha Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene na Menejimenti ya Wakala hiyo kilicholenga kukagua maendeleo ya ujenzi huo jijini Dar es Salaam.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene akisalimiana na Viongozi na Watendaji wa Wakala wa Ndege za Serikali baada ya kuwasili katika eneo hilo kwa lengo la kufanya kikao kazi na kukagua maendeleo ya ujenzi wa Karakana ya Wakala wa Ndege za Serikali jijini Dar es Salaam.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene (wa pili kutoka kulia) akiteta jambo na Mwakilishi wa Katibu Mkuu-IKULU, Bi. Neema Jamu (wa kwanza kulia). Wa kwanza kushoto ni Mwenyekiti wa Bodi ya Ushauri ya Wakala wa Ndege za Serikali Prof. Mhandisi Idrissa Mshoro na wa pili kutoka kulia ni Mkurugenzi wa TGFA, Capt. Budodi Budodi.

MHE. SIMBACHAWENE AZINDUA BODI MPYA YA WAKURUGENZI YA TAASISI YA UONGOZI ASISITIZA KUZINGATIA MISINGI IMARA ILIYOWEKWA NA BODI ILIYOPITA

Na. Veronica Mwafisi-Dar es Salaam

Tarehe 28 Novemba, 2024

Waziri wa Nchi, Ofisi ya Rais, Menejimenti ya Utumishi ya Utumishi wa Umma na Utawala Bora, Mhe. George Simbachawene amezindua Bodi mpya ya Wakurugenzi ya Taasisi ya UONGOZI huku akiisisitiza Bodi hiyo kuzingatia misingi thabiti iliyowekwa na Bodi iliyomaliza muda wake ili kufikia malengo ya uanzishwaji wa Taasisi hiyo.

Mhe. Simbachawene amesema Taasisi ya UONGOZI ilianzishwa kama kituo cha kikanda ambacho lengo lake ni kuimarisha uwezo wa viongozi wa Afrika kusimamia maendeleo endelevu ya Bara la Afrika.

Mhe. Simbachawene amezindua Bodi hiyo leo tarehe 28 Novemba, 2024 jijini Dar es Salaam.

Amesema kulingana na wasifu wa wajumbe wa Bodi hiyo mpya ya Wakurugenzi ana imani kuwa italeta mitazamo isiyo na kifani kwa Taasisi ya UONGOZI.

Kutokana na malengo ya uanzishwaji wa Taasisi ya UONGOZI, ni lazima bodi iwe na hadhi ya kimataifa na kutambuliwa jambo ambalo ndilo hitaji la Hati ya Kuanzisha Taasisi hiyo.

Mhe. Simbachawene amewapongeza wajumbe wapya wa Bodi kwa kuaminiwa na kuteuliwa. Aidha, amemshukuru Rais wa Jamhuri ya Muungano wa Tanzania Mhe. Dkt Samia Suluhu Hassan kwa kuteua bodi yenye mchanganyiko wa watu wa mataifa mbalimbali na kuamini kuwa itakuwa na kitu kipya ili kufikia malengo ya kuanzishwa kwa taaisi hiyo.

Ameongeza kuwa, Wakurugenzi wa Bodi waliotangulia waliweka misingi ya Taasisi kustawi. “Hivi ndivyo uongozi bora ulivyo. Tunapowapongeza wakurugenzi wapya kwa uteuzi wao unaostahili, tunawashukuru wakurugenzi waliopita kwa kazi nzuri na kwa kutumikia muda wao kwa uadilifu.” Mhe. Simbachawene amesisitiza.

Amesema Serikali ya Tanzania inatambua umuhimu wa uongozi na maendeleo ya uongozi katika maendeleo endelevu ya Tanzania na Bara la Afrika na ndio maana imeendelea kuunga mkono maendeleo ya Taasisi ya UONGOZI.

Vile vile ameishukuru Serikali ya Finland kwa kuunga mkono na kushirikiana na Tanzania katika kuiendeleza Taasisi ya UONGOZI kwa kipindi cha miaka kumi na minne iliyopita ambao umechangia mafanikio makubwa ya Taasisi hiyo.

Amesema, pamoja na wadau mbalimbali wanaochangia maendeleo ya Taasisi ya UONGOZI Serikali ya Tanzania na Finland zimechangia kwa kiasi kikubwa maendeleo ya taasisi hiyo.

Kwa upande wake Mwenyekiti wa Bodi ya Wakurugenzi ya Taasisi ya UONGOZI, Balozi Ombeni Sefue amemshukuru Rais Mhe. Dkt. Samia Suluhu Hassan kwa kuwaamini na kuwateua katika bodi hiyo na amemshukuru Waziri Simbachawene kwa kuwazindulia Bodi hiyo.

Balozi Sefue, amesema bodi hiyo ambayo ni ya tano itaendeleza kazi ya bodi iliyomaliza muda wake ambayo iliweka mkakati wa muda mrefu unaoongoza kazi ya taasisi na mkakati huo una Idhini ya Serikali, hivyo inachukua pale walipoachia bodi iliyopita kuhakikisha mkati unatekelezwa na kufikia malengo ya taasisi. 

Waziri wa Nchi, Ofisi ya Rais, Menejimenti ya Utumishi ya Utumishi wa Umma na Utawala Bora, Mhe. George Simbachawene akizungumza  wakati akizindua Bodi mpya ya Wakurugenzi ya Taasisi ya UONGOZI  Jijini Dar es Salaam.

Sehemu ya Wakurugenzi wa Bodi mpya ya Taasisi ya UONGOZI wakimsikiliza Waziri wa Nchi, Ofisi ya Rais, Menejimenti ya Utumishi ya Utumishi wa Umma na Utawala Bora, Mhe. George Simbachawene (hayupo pichani) wakati wa uzinduzi wa Bodi hiyo uliofanyika Jijini Dar es Salaam.

Mwenyekiti wa Bodi ya Wakurugenzi ya Taasisi ya UONGOZI, Balozi Ombeni Sefue akitoa neno la shukrani kwa Waziri wa Nchi, Ofisi ya Rais, Menejimenti ya Utumishi ya Utumishi wa Umma na Utawala Bora, Mhe. George Simbachawene (hayupo pichani) baada ya Waziri huyo kuzindua Bodi hiyo Jijini Dar es Salaam.

Sehemu ya Wakurugenzi wa Bodi mpya ya Taasisi ya UONGOZI wakijadili jambo wakati wa uzinduzi wa Bodi hiyo uliofanyika Jijini Dar es Salaam.

Waziri wa Nchi, Ofisi ya Rais, Menejimenti ya Utumishi ya Utumishi wa Umma na Utawala Bora, Mhe. George Simbachawene (katikati) akitazama baadhi ya Nyaraka kabla ya kuzindua Bodi mpya ya Wakurugenzi ya Taasisi ya UONGOZI Jijini Dar es Salaam. Kushoto kwake ni Katibu Mkuu Kiongozi Zanzibar, Mhandisi Zena Said, kulia kwake ni Mwenyekiti wa Bodi hiyo, Balozi Ombeni Sefue. Wa kwanza kushoto ni Mtendaji Mkuu wa Taasisi ya UONGOZI, Bw. Kadari Singo na wa kwanza kulia ni Mwakilishi wa Katibu Mkuu-IKULU, Bi. Neema Jamu.

Mtendaji Mkuu wa Taasisi ya UONGOZI Bw. Kadari Singo akitoa maelezo ya awali kuhusu Taasisi ya UONGOZI kabla ya Waziri wa Nchi, Ofisi ya Rais, Menejimenti ya Utumishi ya Utumishi wa Umma na Utawala Bora, Mhe. George Simbachawene kuzindua Bodi mpya ya Wakurugenzi ya Taasisi ya UONGOZI Jijini Dar es Salaam.

Sehemu ya washiriki waliohudhuria uzinduzi wa Bodi mpya ya Taasisi ya UONGOZI wakimsikiliza Waziri wa Nchi, Ofisi ya Rais, Menejimenti ya Utumishi ya Utumishi wa Umma na Utawala Bora, Mhe. George Simbachawene (hayupo pichani) wakati wa uzinduzi huo uliofanyika Jijini Dar es Salaam.

Waziri wa Nchi, Ofisi ya Rais, Menejimenti ya Utumishi ya Utumishi wa Umma na Utawala Bora, Mhe. George Simbachawene (katikati) akiwa katika picha ya pamoja na baadhi ya Wakurugenzi wa Bodi mpya ya Taasisi ya UONGOZI baada ya kuzindua bodi hiyo Jijini Dar es Salaam. Wengine ni Watendaji na Viongozi mbalimbali.

 

MHE. SIMBACHAWENE ASISITIZA WATUMISHI WA UMMA NA WATANZANIA WALIOJIANDIKISHA KUPIGA KURA KUJITOKEZA KUCHAGUA VIONGOZI WA SERIKALI ZA MITAA TAREHE 27.11.2024

 Na. Veronica Mwafisi-Dodoma

Tarehe 26 Novemba, 2024

Waziri wa Nchi, Ofisi ya Rais, Menejimenti ya Utumishi ya Utumishi wa Umma na Utawala Bora, Mhe. George Simbachawene amewasisitiza Watumishi wa Umma na Watanzania wote waliojiandikisha kupiga kura kujitokeza kufanya uchaguzi wa Viongozi wa Serikali za Mitaa utakaofanyika kesho tarehe 27 Novemba, 2024 Tanzania Bara.

Mhe. Simbachawene ametoa rai hiyo leo akiwa Ofisini kwake katika Mji wa Serikali, Mtumba, Jijini Dodoma.

Mhe. Simbachawene amesema, zoezi la kesho ni la kihistoria katika nchi yetu hivyo kila Mtanzania mwenye sifa wakiwemo Watumishi wa Umma wote ni muhimu wakashiriki katika kuwachagua Wenyeviti wa Serikali za Mitaa, Wenyeviti wa Vijiji na Vitongoji.

 

“Kwa kuwa zoezi hili ni la kikatiba, nikiwa ndiye Waziri mwenye dhamana ya kusimamia masuala ya Utumishi wa Umma na Utawala Bora, ninatoa rai kwa Watumishi wote wa Umma na wananchi wote waliojiandikisha kujitokeza kupiga kura ili kuchagua viongozi bora kwa maendeleo ya taifa letu.” Mhe. Simbachawene amesisitiza.

Ameongeza kuwa, Rais wa Jamhuri ya Muungano wa Tanzania, Mhe. Dkt. Samia Suluhu Hassan ametangaza siku ya Jumatano tarehe 27 Novemba, 2024 kuwa ni siku ya mapumziko ili kutoa nafasi kwa watumishi wote kwenda kupiga kura. Hivyo, Watumishi wa umma kutokushiriki kwenye mambo muhimu ya kikatiba ni upungufu katika kutekeleza majukumu ya kiutumishi, hivyo amewasisitiza kwenda kupiga kura bila kupuuza.

Waziri wa Nchi, Ofisi ya Rais, Menejimenti ya Utumishi wa Umma na Utawala Bora, Mhe. George Simbachawene akisisitiza Watumishi wa Umma na Watanzania kushiriki Uchaguzi wa Serikali za Mitaa.

OFISI YA RAIS - UTUMISHI YAENDELEA KUTOA MAFUNZO ELEKEZI KWA WATUMISHI WAKE IKISISITIZA UTOAJI WA HUDUMA BORA

 Na. Veronica Mwafisi-Dodoma

25 Novemba, 2024

Ofisi ya Rais, Menejimenti ya Utumishi wa Umma na Utawala Bora imeendelea kutoa mafunzo elekezi kwa watumishi wa ofisi yake kwa lengo la kuboresha utendaji kazi ili kuwawezesha watumishi hao kutoa huduma bora kwa wananchi na wadau mbalimbali wa Serikali.

Akiwasilisha mada kuhusu Huduma kwa Mteja, Afisa Utumishi Mwandamizi kutoka Idara ya Uendelezaji Sera, Ofisi ya Rais-UTUMISHI na Utawala Bora, Bw. Emmanuel Luvanda amesema malengo ya Utumishi wa Umma ni kuwahudumia wananchi kwa kiwango cha hali ya juu, hivyo kila mtumishi ni vizuri akawajibika kikamilifu ili kufikia malengo hayo.

Bw. Luvanda ameongeza kuwa, kwa kuendelea kuwajibika kwa wananchi kwa kutoa huduma bora kwao kunawafanya wawe na imani kubwa na Serikali yao.

Aidha, Bw. Luvanda amewashauri watumishi wa Ofisi hiyo kutumia changamoto mbalimbali kama fursa ya kujifunza na kuona namna ya kutatua changamoto hizo na kuleta maboresho yenye ufanisi mkubwa.

Kwa upande wake Mkurugenzi wa Idara ya Utawala na Usimamizi wa Rasilimaliwatu, Bw. Musa Magufuli ametoa wito kwa watumishi wa ofisi hiyo kuwahudumia wadau wote wanaohitaji huduma katika ofisi hiyo kwa kuzingatia misingi ya huduma bora ili kuleta ufanisi katika utendaji kazi pamoja na kujenga taswira nzuri ya ofisi.

Mafunzo hayo elekezi ni utaratibu uliowekwa na Ofisi hiyo kwa lengo la kutoa uelewa kuhusu masuala mbalimbali ya Utumishi wa Umma ili kuwawezesha kutekeleza majukumu yao ipasavyo.

Mkurugenzi wa Utawala na Usimamizi wa Rasilimaliwatu, Ofisi ya Rais, Menejimenti ya Utumishi wa Umma na Utawala Bora, Bw. Musa Magufuli (aliyenyoosha mkono) akizungumza baada ya kumalizika mafunzo ya kuwajengea uwezo watumishi wa ofisi hiyo yaliyofanyika katika Mji wa Serikali Mtumba, jijini Dodoma.

Sehemu ya Watumishi wa Ofisi ya Rais, Menejimenti ya Utumishi wa Umma na Utawala Bora, wakifuatilia mafunzo ya kuwajengea uwezo watumishi hao katika masuala ya utendaji kazi yaliyofanyika katika ofisi hiyo iliyopo Mji wa Serikali Mtumba, jijini Dodoma.

Sehemu ya Wakurugenzi na Wakurugenzi wasaidizi wa Ofisi ya Rais-UTUMISHI na Utawala Bora wakimsikiliza Afisa Utumishi Mwandamizi kutoka ofisi hiyo Bw. Emmanuel Luvanda (hayupo pichani) wakati akifanya wasilisho kuhusu Huduma kwa Mteja walipokuwa kwenye mafunzo ya kuwajengea uwezo katika masuala ya utendaji kazi.

Afisa Utumishi Mwandamizi kutoka Ofisi ya Rais, Menejimenti ya Utumishi wa Umma na Utawala Bora Bw. Emmanuel Luvanda (aliyesimama) akiwasilisha mada kuhusu Huduma kwa Mteja wakati wa mafunzo ya kuwajengea uwezo watumishi wa Ofisi ya Rais-UTUMISHI na Utawala Bora yaliyofanyika katika ofisi hiyo iliyopo Mji wa Serikali Mtumba, jijini Dodoma.

Sehemu ya Watumishi wa Ofisi ya Rais, Menejimenti ya Utumishi wa Umma na Utawala Bora, wakifuatilia mafunzo ya kuwajengea uwezo watumishi hao katika masuala ya utendaji kazi yaliyofanyika katika ofisi hiyo iliyopo Mji wa Serikali Mtumba, jijini Dodoma.

Mtumishi wa Ofisi ya Rais-UTUMISHI na Utawala Bora, Bi. Zena Makaye (aliyesimama) akichangia hoja wakati wa mafunzo ya kuwajengea uwezo watumishi hao katika utendaji kazi yaliyofanyika katika ofisi hiyo iliyopo Mji wa Serikali Mtumba, jijini Dodoma.

Mtumishi wa Ofisi ya Rais-UTUMISHI na Utawala Bora, Bw. Baraka Kilagu (aliyesimama) akiwasilisha hoja wakati wa mafunzo ya kuwajengea uwezo watumishi hao katika utendaji kazi yaliyofanyika katika ofisi hiyo iliyopo Mji wa Serikali Mtumba, jijini Dodoma.